Qazaqstandyq tanymal ánshi Lýina otbasyndaǵy qýanyshty jańalyǵyn kópshilikpen bólisti. Óner iesi 16 qazan kúni saǵat 09:06-da ekinshi ulyn dúniege ákelgen. Erli-zaiyptylar nárestege Deni esimin bergen, dep habarlaidy ult.kz.
Ánshi Instagram paraqshasynda perzenthanada túsirilgen áserli kadrlardy jariialap, ekinshi ret ana atanǵanda qandai sezimde bolǵanyn aityp berdi. Onyń sózinshe, arada alty jyl ótse de, bosaný aldyndaǵy qobaljý men qorqynysh seiilmegen.
Bir qyzyǵy, Lýinanyń tuńǵyshyn dúniege ákelýine kómektesken dárigerler ekinshi sábiin de qabyldaǵan.
"Bul joldan buryn ótken siiaqtymyn. Alty jyl buryn dál osy dárigerler tobymen alǵash ret ana atandym. Biraq ekinshi ret te qorqynysh az bolmaidy eken. Bálkim, odan da kóbirek shyǵar. Óitkeni ómir syilaýdyń qandai ǵajap ekenin, bul sáttiń qanshalyqty názik bolatynyn túsinesiń. Qatty ýaiymdadym. Qoryqtym", – dep jazdy óner iesi.
Lýina ómirindegi mańyzdy sátte janynan tabylyp, demeý bolǵan jubaiy Artemge de júrekjardy alǵysyn jetkizdi. Ánshiniń aitýynsha, kúieýiniń qoldaýy oǵan erekshe kúsh bergen.
"Onyń qatysýynsyz, sabyrlylyǵy men qoldaýynsyz maǵan qanshalyqty qiyn bolaryn bilmeimin. Osyndai sátterde janyńda óz adamyńnyń bolýy qanshalyqty mańyzdy ekenin túsinesiń. Súiiktim, osy joldan birge ótkenimiz úshin raqmet. Janymda bolyp, ulymyzdy alǵash qarsy alǵanyń úshin raqmet", – dedi ol.
Ánshi ekinshi sábiiniń ómirge kelýimen otbasyndaǵy baqyttyń eselengenin jasyrmady. Ol ana bolýdyń ár sátin qaita bastan ótkerýge daiyn ekenin aityp, kópshilikti áserli jazbasymen tolqytty.
"Endi bizdiń eki ulymyz bar. Boiymyzdan tys ómir súretin eki júregimiz. Eki eń úlken mahabbatymyz. Men baqyttymyn. Rizamyn. Onyń alǵashqy daýysyn estý, alǵash kezdesý, alǵash qol tigizý úshin barlyq qorqynyshymnan qaita óter edim", – dep jazdy Lýina.
Aita keteiik, Lýina men onyń jubaiy Artem 2020 jyly alǵash ret ata-ana atanǵan. Sol jyly olardyń David esimdi uly dúniege kelgen. Arada alty jyl ótkende juldyzdy otbasy taǵy bir ulmen tolyqty.
Lýina kim?
Lýina – qazaqstandyq estrada ánshisi, shyn esimi – Lýiza Karinbaeva, qazirgi tegi – Obýhova. Ol 1987 jyly 25 mamyrda Mańǵystaý oblysynyń Jańaózen qalasynda dúniege kelgen. Balalyq shaǵynyń bir bóligi Aqtaý qalasynda ata-ájesiniń tárbiesinde ótken. Mektep bitirgennen keiin Astrahanda qarjy mamandyǵy boiynsha bilim alýǵa túsken. Alaida bala kezinen mýzykaǵa qyzyǵyp, jasóspirim shaǵynda án jazyp, túrli baiqaýlarǵa qatysqan. 2010 jyly Qazaqstandaǵy X Factor mýzykalyq jobasynyń jartylai finalyna deiin jetken. Keiin prodiýser Jomart Súleimenovpen tanysyp, 2011 jyly Luina sahnalyq esimimen shyǵarmashylyq jolyn bastaǵan. Onyń alǵashqy tanymal týyndylarynyń biri – “Lýna” áni.
Ánshi “Odin”, “Titanik”, “Hey Yo” siiaqty ánderimen de tyńdarmanǵa tanyldy. 2012 jyly Cosmopolitan jýrnalynyń nusqasy boiynsha “Jyl ánshisi” atanǵan. Sondai-aq, birneshe ret Eýraziialyq mýzykalyq syilyqtyń úzdigi retinde tanylǵan. Sonymen qatar “Astana” fýtbol klýbynyń ánuranyn oryndaýǵa qatysqanyn aityp, bul jobany erekshe maqtan tutatynyn jetkizdi. Lýina 2019 jyly kásipker Artem Obýhovqa turmysqa shyqqan. Erli-zaiyptylardyń tuńǵysh uly David 2020 jyly dúniege kelse, 2026 jylǵy 16 qazanda Deni esimdi ekinshi uly ómirge keldi.
