قازاقستاندىق تانىمال ەنشٸ لۋينا وتباسىنداعى قۋانىشتى جاڭالىعىن كٶپشٸلٸكپەن بٶلٸستٸ. ٶنەر يەسٸ 16 قازان كٷنٸ ساعات 09:06-دا ەكٸنشٸ ۇلىن دٷنيەگە ەكەلگەن. ەرلٸ-زايىپتىلار نەرەستەگە دەني ەسٸمٸن بەرگەن, دەپ حابارلايدى ult.kz.
ەنشٸ Instagram پاراقشاسىندا پەرزەنتحانادا تٷسٸرٸلگەن ەسەرلٸ كادرلاردى جارييالاپ, ەكٸنشٸ رەت انا اتانعاندا قانداي سەزٸمدە بولعانىن ايتىپ بەردٸ. ونىڭ سٶزٸنشە, ارادا التى جىل ٶتسە دە, بوسانۋ الدىنداعى قوبالجۋ مەن قورقىنىش سەيٸلمەگەن.
بٸر قىزىعى, لۋينانىڭ تۇڭعىشىن دٷنيەگە ەكەلۋٸنە كٶمەكتەسكەن دەرٸگەرلەر ەكٸنشٸ سەبيٸن دە قابىلداعان.
"بۇل جولدان بۇرىن ٶتكەن سيياقتىمىن. التى جىل بۇرىن دەل وسى دەرٸگەرلەر توبىمەن العاش رەت انا اتاندىم. بٸراق ەكٸنشٸ رەت تە قورقىنىش از بولمايدى ەكەن. بەلكٸم, ودان دا كٶبٸرەك شىعار. ٶيتكەنٸ ٶمٸر سىيلاۋدىڭ قانداي عاجاپ ەكەنٸن, بۇل سەتتٸڭ قانشالىقتى نەزٸك بولاتىنىن تٷسٸنەسٸڭ. قاتتى ۋايىمدادىم. قورىقتىم", – دەپ جازدى ٶنەر يەسٸ.
لۋينا ٶمٸرٸندەگٸ ماڭىزدى سەتتە جانىنان تابىلىپ, دەمەۋ بولعان جۇبايى ارتەمگە دە جٷرەكجاردى العىسىن جەتكٸزدٸ. ەنشٸنٸڭ ايتۋىنشا, كٷيەۋٸنٸڭ قولداۋى وعان ەرەكشە كٷش بەرگەن.
"ونىڭ قاتىسۋىنسىز, سابىرلىلىعى مەن قولداۋىنسىز ماعان قانشالىقتى قيىن بولارىن بٸلمەيمٸن. وسىنداي سەتتەردە جانىڭدا ٶز ادامىڭنىڭ بولۋى قانشالىقتى ماڭىزدى ەكەنٸن تٷسٸنەسٸڭ. سٷيٸكتٸم, وسى جولدان بٸرگە ٶتكەنٸمٸز ٷشٸن راقمەت. جانىمدا بولىپ, ۇلىمىزدى العاش قارسى العانىڭ ٷشٸن راقمەت", – دەدٸ ول.
ەنشٸ ەكٸنشٸ سەبيٸنٸڭ ٶمٸرگە كەلۋٸمەن وتباسىنداعى باقىتتىڭ ەسەلەنگەنٸن جاسىرمادى. ول انا بولۋدىڭ ەر سەتٸن قايتا باستان ٶتكەرۋگە دايىن ەكەنٸن ايتىپ, كٶپشٸلٸكتٸ ەسەرلٸ جازباسىمەن تولقىتتى.
"ەندٸ بٸزدٸڭ ەكٸ ۇلىمىز بار. بويىمىزدان تىس ٶمٸر سٷرەتٸن ەكٸ جٷرەگٸمٸز. ەكٸ ەڭ ٷلكەن ماحابباتىمىز. مەن باقىتتىمىن. ريزامىن. ونىڭ العاشقى داۋىسىن ەستۋ, العاش كەزدەسۋ, العاش قول تيگٸزۋ ٷشٸن بارلىق قورقىنىشىمنان قايتا ٶتەر ەدٸم", – دەپ جازدى لۋينا.
ايتا كەتەيٸك, لۋينا مەن ونىڭ جۇبايى ارتەم 2020 جىلى العاش رەت اتا-انا اتانعان. سول جىلى ولاردىڭ داۆيد ەسٸمدٸ ۇلى دٷنيەگە كەلگەن. ارادا التى جىل ٶتكەندە جۇلدىزدى وتباسى تاعى بٸر ۇلمەن تولىقتى.
لۋينا كٸم?
لۋينا – قازاقستاندىق ەسترادا ەنشٸسٸ, شىن ەسٸمٸ – لۋيزا كارينباەۆا, قازٸرگٸ تەگٸ – وبۋحوۆا. ول 1987 جىلى 25 مامىردا ماڭعىستاۋ وبلىسىنىڭ جاڭاٶزەن قالاسىندا دٷنيەگە كەلگەن. بالالىق شاعىنىڭ بٸر بٶلٸگٸ اقتاۋ قالاسىندا اتا-ەجەسٸنٸڭ تەربيەسٸندە ٶتكەن. مەكتەپ بٸتٸرگەننەن كەيٸن استراحاندا قارجى ماماندىعى بويىنشا بٸلٸم الۋعا تٷسكەن. الايدا بالا كەزٸنەن مۋزىكاعا قىزىعىپ, جاسٶسپٸرٸم شاعىندا ەن جازىپ, تٷرلٸ بايقاۋلارعا قاتىسقان. 2010 جىلى قازاقستانداعى X Factor مۋزىكالىق جوباسىنىڭ جارتىلاي فينالىنا دەيٸن جەتكەن. كەيٸن پروديۋسەر جومارت سٷلەيمەنوۆپەن تانىسىپ, 2011 جىلى Luina ساحنالىق ەسٸمٸمەن شىعارماشىلىق جولىن باستاعان. ونىڭ العاشقى تانىمال تۋىندىلارىنىڭ بٸرٸ – “لۋنا” ەنٸ.
ەنشٸ “ودين”, “تيتانيك”, “Hey Yo” سيياقتى ەندەرٸمەن دە تىڭدارمانعا تانىلدى. 2012 جىلى Cosmopolitan جۋرنالىنىڭ نۇسقاسى بويىنشا “جىل ەنشٸسٸ” اتانعان. سونداي-اق, بٸرنەشە رەت ەۋرازييالىق مۋزىكالىق سىيلىقتىڭ ٷزدٸگٸ رەتٸندە تانىلعان. سونىمەن قاتار “استانا” فۋتبول كلۋبىنىڭ ەنۇرانىن ورىنداۋعا قاتىسقانىن ايتىپ, بۇل جوبانى ەرەكشە ماقتان تۇتاتىنىن جەتكٸزدٸ. لۋينا 2019 جىلى كەسٸپكەر ارتەم وبۋحوۆقا تۇرمىسقا شىققان. ەرلٸ-زايىپتىلاردىڭ تۇڭعىش ۇلى داۆيد 2020 جىلى دٷنيەگە كەلسە, 2026 جىلعى 16 قازاندا دەني ەسٸمدٸ ەكٸنشٸ ۇلى ٶمٸرگە كەلدٸ.
