Sátbaevtaǵy turǵyndar men politsiia arasyndaǵy qaqtyǵystan keiin ustalǵan adam sany 19-ǵa jetti.
Tergeý amaldarynda bul san eselep ósýi múmkin. Óitkeni 24 shildege qaraǵan túni qalada oiran salǵandardyń sany myńǵa jýyq. Olarǵa Qylmystyq kodekstiń birneshe babymen aiyp taǵylǵan, dep habarlady KTK.
Aita keteiik, qaqtyǵysqa qalada joǵalǵan 5 jastaǵy qyzdyń eresek kórshisinen qorlyq kórýi sebep boldy. Ashynǵan top politsiiadan kúdiktini berýdi talap etip, istiń sońy nasyrǵa shapqan bolatyn.
Sátbaevtaǵy búgingi tirshilik qalypty. Astan-kesteńi shyqqan podezd de tynysh. Tek sol kúngi oqiǵany turǵyndar kópke deiin umyta almaidy.
Joǵalǵan búldirshindi tabýda beinekameranyń kómegi zor bolǵan. Óitkeni beinetaspada qyzdyń podezge kirgen sáti bar da, shyqqany joq. Sondyqtan politsiia men eriktiler podezdegi barlyq páterdi tinti bastaǵan. Kúdik týdyrǵany – esigin ashpaǵan birinshi qabattaǵy páter.
"Adamdar terezeden ishte bireý bar ekenin baiqap qaldy. Politsiia qyzmetkerleri esikti syndyryp, ishke kirdi. Denesin jalańashtaǵan kisini ustap jatqanyn óz kózimmen kórip, kameraǵa túsirip turdym. Sosyn ashynǵan halyq terezeni shaǵyp, toryn julyp aldy. Ishke jastar kire bastady", - deidi Sátbaev qalasynyń turǵyny Botagóz Bushmanova.
Qyzdy ata-anasyna berip, kúdiktini shyǵarmaq bolǵanda oiran bastalǵan. Ashý-yzyǵa erik bergender páterge basa kóktep kirgen. Úi aldynda azǵantai politseilerdiń yrqyna kónbegen qaraqurym jurt esik aldyndaǵy múlikti de talqandaýǵa kirisipti. Istiń nasyrǵa shapqanyn kórgen politseiler kúdiktige politsiia kiimin kiindirip úiden alyp ketken.
"Ony úiden alyp shyǵý qiyn bolǵannan keiin kiimin aýystyryp, qaýipsizdigin qamtamasyz ettik. Sodan jinalǵandar politsiia bólimine keldi. Baqylaý pýnktin syndyryp, tas laqtyryp, biraz shyǵyn keltirdi", - deidi Sátbaev qalalyq PB bastyǵy Jandos Qarabekov.
Politsiia bóliminiń aldynda birneshe qyzmettik kólik talqandalyp, bir jeńil kólik pen avtobýs órtendi. Ǵimarat ta zaqymdalǵan. Jalpy kelgen shyǵyn kólemi 60 million teńge.
Oqiǵadan eki apta ótkende ǵana basty kúdiktiniń páterin jaqyndary jinastyryp júr. Suhbattan at-tonyn ala qashty. Belgilisi, 62 jastaǵy turǵynnyń áieli, bólek turatyn balalary men nemereleri bar eken. Sol kúni onyń áieli saiajaiǵa ketip, kúdikti úide jalǵyz qalǵan.
Tergeý málimetinshe oǵan adam urlaý jáne zorlaý baptary boiynsha aiyp taǵylǵan.
