«Saryarqa» gaz qubyry 2040 jylǵa qarai 2,4 mln turǵyny bar 171 eldi mekendi kógildir otynmen qamtamasyz etedi. Bul jaiynda QR Premer-Ministri Asqar Maminniń Májilis depýtattarynyń saýalyna bergen jaýabynda aitylǵan, dep habarlaidy "Ult aqparat".
Úkimet basshysynyń atap ótýinshe, 2019 jyldyń 27 jeltoqsanynda «Saryarqa» magistraldy gaz qubyrynyń 1-kezeńiniń qurylysy aiaqtalyp, paidalanýǵa berilgen. Gaz qubyrynyń jelilik bólikten basqa Astana-1, Astana-2, Qaraǵandy, Temirtaý ján Jezqazǵan avtomattandyrylǵan gaz taratý stansasy bar. Munan bólek, keleshekte jergilikti atqarýshy organdar tarapynan Jáirem, Arshaly, Osakarov, Atasý, S.Seifýllin, Shahtinsk avtomattandyrylǵan gaz taratý stansasyn salý kózdelip otyr.
«Saryarqa» jobasynyń tehnikalyq-ekonomikalyq negizdemesine sáikes, «Saryarqa» magistraldy gaz qubyrynyń birinshi kezeńinde 2040 jylǵa qarai 2,7 mln turǵyny bar 171 eldi mekendi gazdandyrý josparlanǵan. Iaǵni, gaz qubyrynyń gidravlikalyq qýaty jetkilikti jáne qosymsha parallel tarmaq qurylysyn qajet etpeidi. Qazirgi ýaqytta Nur-Sultan qalasynda, Aqmola men Qaraǵandy oblystarynda magistraldy gaz qubyryna qosý úshin gaz taratý jelileri qurylysynyń 1-kezegi josparlanǵan. Ol vedomstvodan tys saraptamadan tolyqtai ótip, oń qorytyndy aldy. Nur-Sultan qalasy men Qaraǵandy oblysynda gaz taratý jelisiniń qurylysy ótken jyldyń kúz aiynda bastaldy. Olardy qarjylandyrý úshin 2019 jyly respýblikalyq biýdjetten Nur-Sultan qalasyna 3 mlrd, Qaraǵandy oblysyna 2,4 mlrd teńge bólindi. Atalǵan qarjy tolyqtai igerildi», - dedi ol.
Premer-Ministrdiń dereginshe, 2020-2022 jyldarǵa arnalyp bekitilgen biýdjette Nur-Sultan qalasyna 8,6 mlrd teńge, Qaraǵandy oblysyna 58,8 mlrd teńge qarastyrylǵan.
«Aqmola oblysynda memlekettik saraptama qorytyndysyn kesh alýǵa bailanysty qurylys jumystary bastalǵan joq. Degenmen, qazirgi ýaqytta bul másele sheshildi jáne Aqmola oblysynyń ákimdigi merdiger uiymdy aiqyndaýǵa arnalǵan konkýrstyq protsedýrany júrgizip jatyr. Buǵan qosa, Aqmola oblysynyń ákimdigi 2020 jyly respýblikalyq biýdjetten gaz taratý jelisi qurylysyn qarjylandyrýǵa arnalǵan biýdjettik ótinimdi Energetika ministrligine engizdi. Atalǵan biýdjettik ótinim 2020 jylǵa arnalǵan respýblikalyq biýdjetti birinshi naqtylaý barysynda respýblikalyq biýdjettik komissiianyń qaraýyna engiziletin bolady. Atalǵan óńirde gaz taratý jelisin salý máselesi Úkimettiń turaqty baqylaýynda tur. Sonymen qatar qazirgi ýaqytta Úkimet eldiń soltústik óńirlerin gazdandyrý úshin «Saryarqa» magistraldy gaz qubyrynyń ekinshi jáne úshinshi kezeńderin júzege asyrý máselesin qarastyryp jatyr», - dedi Asqar Mamin.
