Foto: ratel.kz
QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin sapasyz bailanys pen internet úshin operatorlar qomaqty somada aiyppul tólep jatqanyn aitty, dep habarlaidy QazAqparat.
«Qazaqstanda 6 406 eldi meken bar, onyń 4 733-i, iaǵni 74 paiyzy keń jolaqty internetke qosylǵan. 1 628 eldi meken 4G-ge qosylǵan, al 3 105-i 3G tehnologiiasymen qamtamasyz etilgen. Barlyq eldi mekenniń 34 paiyzy ADSL tehnologiiasymen, iaǵni mys symymen qosylǵan, sondai-aq optika júiesimen 26 paiyzy qamtamasyz etilip otyr. Sonymen qatar, turǵyndar sany 260 myńnan asatyn 1673 aýyl keń jolaqty uialy bailanys internetpen qamtylmaǵan. Bailanys sapasyn kóterý maqsatynda biz jyl saiyn «bazalyq stantsiialardyń» sanyn kóbeitip jatyrmyz. Búginde 43 myńdai bazalyq stantsiia ornattyq. Demek, jyl saiyn 4 myń jańa stantsiiaǵa iske qosylady», - dedi Mýsin Parlament Májilisindegi Úkimet saǵatynda.
Osy oraida ol zańnamalyq ózgerister arqyly operatorlardy bailanys infraqurylymyna investitsiia salýǵa yntalandyrý tetikteri bekitilgenin aitty.
«Atap aitqanda, árbir bailanys tehnologiiasy úshin eń tómengi sapa parametrleri belgilengen. Naqty aitatyn bolsaq, 3G-ge sekýndyna 1 Mbit, 4G-ge sekýndyna 5 Mbit aiqyndaldy. Bul mehanizmge sáikes, bekitilgen sapa kórsetkishterin birinshi ret buzǵany úshin aiyppul somasy 100 ailyq eseptik kórsetkishten 1000-ǵa kóterildi. Bul talap qaita buzylsa, 200 AEK-ten 15 myńǵa deiin jetedi. Shynyn aitý kerek, buryn aiyppul mólsheri az bolǵan. Sol sebepti operatorlarǵa, basty jaýapkershilikti almai, jai ǵana aiyppul tólep júre berý yǵaily edi», - dedi vedomstvo basshysy.
Bul turǵyda ol aiyppul somasynyń ósýi operatorlardy óz infraqurylymyna jaýapkershilikpen qaraýǵa mindetteitinin aitty.
«Aiyppul mehanizmi biýdjetke túsetin kiristi kóterdi. 2022 jyly barlyǵy 1051 tekserý júrgizilip, 1 mlrd 264 mln teńge somasyna aiyppul jazyldy. Buǵan qosa, aiyppul nátijesinde operatorlar 700 den astam bazalyq stantsiia qosymsha ornatty», - dedi ministr.
