- «Uly Qabyrǵa» Qazaqstan-Qytai burǵylaý kompaniiasy sońǵy eki jylda jumysshylaryn eki ese qysqartty. Qazir 946 adam tizimde bolsa, onyń teń jartysy aqysyz demalysqa shyǵarylǵan.
Búgin 2016 jyldyń qorytyndysy tyńdalyp, iri munai kompaniialarynyń tapsyrysyn qabyldap, burǵylaý jumystaryn júrgizetin «Uly Qabyrǵa» kompaniiasy men kásipodaq, ákimdik úshjaqty memorandýmǵa qol qoiýy tiis bolatyn. Oblys ákimi Berdibek Saparbaev is júzinde oryndalmaityn memorandýmǵa qol qoiýdan bas tartyp, kelisimshartty oryndamaityn munai kompaniiasyn jabýdy usyndy, dep habarlaidy «QazAqparat» tilshisi.
«Uly Qabyrǵa» kompaniia sońǵy jyldary tek shyǵynǵa batyp otyr. Quryltaishylardan da qairan joq. Olar sońǵy jyly 100 million dollar investitsiia quiǵanymen, bári qaryzdy jabýǵa jumsalǵan. Búgin kompaniianyń bas direktory Chjan Tshiýan jumysshylar men kásipodaq, Aqtóbe oblysynyń ákimi Berdibek Saparbaevtyń aldynda esep berdi. Jyl qorytyndysy máz emes.
«Kompaniiada 946 jumysshy bar. Onyń 855-i qazaqstandyq, 66-y qytailyq jumysshy. Qazirgi ýaqytta 25 áiel bala kútimimen úilerinde otyr. Aita ketsem, 2016 jyly kompaniia tabysy 4 milliard 600 million teńgeni qurady. Tabystyń 30 paiyzy jalaqy tóleýge jumsaldy. Sondyqtan, qazir 393 jumysshy aqysyz demalysqa jiberilgen», - dedi kompaniianyń bas direktory Chjan Tshiýan.
«Uly Qabyrǵa» JShS-i munai baǵasynyń arzandap, naryqtaǵy burǵylaý jumystaryna tapsyrys berýshilerdiń tómendeýi kezinde jumysshylaryn qystartý jolymen kompaniiany saqtap otyr. Oblystyq kásipodaq, ákimdik pen kompaniia arasynda ótken jyly 10 talaptan turatyn memorandýmǵa qol qoiylsa, onyń alty tarmaǵy boiynsha mindetter oryndalmaǵan. Basty talap - jumysshylar sanyn saqtap qalý. Bul talapty oryndaýǵa kompaniianyń kúshi jetpedi.
«Ótken jyly jibergen kemshilikterden kompaniia basshylyǵy nátije shyǵarǵan joq. Kompaniia basshylyǵy tek Aqtóbeden emes, kórshi Atyraý, Qyzylorda, Batys Qazaqstan, Mańǵystaý óńirlerine baryp, jumys tabýy qajet edi. Ákimdik tarapynan kómek qajet bolsa, kelisimge daiyn boldyq. Úkimette de otyrys boldy. Naryqtaǵy munai baǵasy turaqtalǵan soń quryltaishylar men «SNPS-Aqtóbemunaigaz» AQ-y qosymsha 23 million dollar investitsiia salyp, burǵylaý jumystaryna tapsyrys berdi. Sol arqyly jumysshylardy qysqartý toqtatylsyn dep aityldy. Ókinishke qarai, jumysshylardy qysqartý toqtatylǵan joq. Tek ótken jyly jumysshylar sany 60 paiyzǵa qysqardy. Mundai qysqartý Aqtóbeniń birde-bir kásipornynda nemese mekemesinde bolǵan joq»,- dedi oblys ákimi Berdibek Saparbaev.
Ujymdyq kelisimshart pen memorandýmdy oryndamaǵan «Uly qabyrǵa» kompaniiasynyń kásipodaq uiymy da synǵa ilikti. Kásipodaq jumysshylardy saqtap qalýdy emes, tek qysqartýǵa kelisim berýdi quptap kelgen.
«Jumysshylardyń quqyǵyn qorǵaýy tiis kásipodaq uiymy esh áreket eptei otyr. Jumysshylardy qorǵai almasa kásipodaq nege qajet? Eger osy jolmen kete berse, kompaniiany jabý kerek. Bizge problemasy kóp kompaniianyń qajeti joq. Qalǵan 948 adamdy jumyspen qamtamasyz ete alamyz dep oilaimyn. Tipti, qazir kóptegen kásiporyn ashylyp jatyr. Bizde «Uly Qabyrǵa» seriktestiginen basqa da jumys bar. Qajet bolsa, biz kompaniiany jabamyz. Zańdy túrde jasalady», - dedi Berdibek Saparbaev.
Sonymen qatar, óńir basshysy úshinshi, tórtinshi dárejeli jumysshylardy Qytaidan aldyrýǵa tyiym salýdy tapsyrdy. Tipti, qysqartý bolǵan kezde qazaqstandyq, qytailyq jumysshylar teń dárejede tizimge alynýyn talap etti.
«Qarapaiym jumysshylardy qysqartqan kezde ózderińdi sol adamdardyń ornyna qoiýlaryń qajet. Olar otbasyn qalai asyraidy? Basshylarǵa, kásipodaq jetekshisine jaqsy. Jumysy bar, eńbekaqyny ýaqytyly alyp otyr. Munyń bári qarjygerlerdiń, ekonomister jumysynyń durys júrgizilmegeninen shyǵyp otyr. Eger tabys ákelmese, kompaniianyń baǵytyn ózgertken jón. Ózge elmen bailanys ornatý qajet dep usynys jasańyzdar, kómektesemiz. Al sizderdiń tarapyńyzdan mundai usynys túsken emes. Tek jumysshylardy qysqartýdy bilesińder», - dedi Berdibek Saparbaev.
Altynai Saǵyndyqova
