Foto: Almaty ákimdigi
2025 jyly Almaty týrizm salasynda turaqty ósim kórsetti: toǵyz ai ishinde qalaǵa shamamen 1,87 mln adam keldi, bul ótken jylmen salystyrǵanda 8% kóp. Olardyń ishinde 563 myńnan astam sheteldik jáne 1,3 mln ishki týrist bar. Bul týraly qalalyq Týrizm basqarmasynyń ókilderi aitty, dep habarlaidy Ult.kz.
Vedomstvo dereginshe, salanyń investitsiiasy 39,4%-ǵa ósip, 198,8 mlrd teńgege jetti. Jeke investitsiia esebinen 941 nómirli qonaq úiler, jataqhanalar jáne demalys bazalary bar 48 jańa nysan ashyldy.
Almaty halyqaralyq deńgeide tanylyp keledi: Bloomberg boiynsha qala álemniń 25 úzdik qalasynyń qataryna endi, al Booking.com dereginshe, Ortalyq Aziianyń tez damyp kele jatqan 10 týristik baǵytynyń biri. CNN jáne The Telegraph qalany aimaqtyń negizgi týristik núktesi retinde atady.
Is-shara týrizmi de jańa deńgeige kóterildi: «ALA CRAFT 2025» halyqaralyq qolóner festivali 15 elden sheberlerdi jinady, al iskerlik MICE – is-sharalarǵa álemniń túkpir-túkpirinen 5,7 myńnan astam adam qatysty.
Qala infraqurylymy damýyn jalǵastyryp keledi. «Alma-Arasan» termaldy bulaǵy qaita jańartyldy, 10 týristik marshrýt kórkeitildi, kún panelderi bar kempingter men taýǵa shyqqanda esepke alatyn qurylǵy ornatyldy. Týrister úshin 110 nysanǵa aýdio nusqaýlyq daiyndaldy, 27,5 myń býklet shyǵaryldy, sondai-aq negizgi kórikti jerlerdiń 5 taktildi modeli jasaldy.
