«Qazposhta» Aktsionerlik qoǵamy satylady. Bul týraly «Samuryq-Qazyna» ulttyq ál-aýqat qorynyń basqarma tóraǵasy Ahmetjan Esimov aitty, dep habarlaidy QazAqparat.
«Kelesi kompaniia - «Qazposhta». Osy jyldardyń ishinde Qor kompaniiaǵa 28 mlrd teńge investitsiia baǵyttady. Shalǵai aýdandardaǵy jelilerinde 8 mlrd teńge shyǵyny bar. Jyl saiyn respýblikalyq biýdjetten bólinetin sýbsidiia 4,2 mlrd teńgeni quraidy. Sondyqtan keńesshiler tikelei ataýly satýdy usynady», - dedi Ahmetjan Esimov Nursultan Nazarbaevtyń tóraǵalyǵymen ótken Qordy basqarý jónindegi keńeste.
Onyń atap ótýinshe, investorlar tarapynan qyzyǵýshylyq bar.
«Árine, bul jumystar da ońai emes. Degenmen maquldanǵan jaǵdaida biz ony barynsha tabysty júzege asyra alamyz dep oilaimyn», - dedi Esimov.
