Temirtaý qalasynda jolaýshylary bar avtobýs qozǵalys kezinde aǵashqa soǵyldy. Oqiǵa saldarynan avtobýs júrgizýshisi kóz jumdy. Jolaýshylar zardap shekken joq. Bul týraly Qaraǵandy oblysynyń Politsiia departamenti habarlady, dep jazady ult.kz.
Politsiia málimetinshe, 14 qarasha kúni saǵat 10:30 shamasynda Yutong markaly jolaýshylar avtobýsy aǵashqa soǵylǵan.
Aldyn ala málimet boiynsha, avtobýs tizgininde bolǵan 64 jastaǵy júrgizýshiniń jol ústinde kenetten jaǵdaiy nasharlap, esinen tanyp qalǵan. Sonyń saldarynan kólik basqarýdan shyǵyp, aǵashqa soǵylǵan. Júrgizýshi oqiǵa ornynda qaitys boldy.
Avtobýs salonynda shamamen 15 jolaýshy bolǵan. Olardyń eshqaisysy zardap shekken joq.
Temirtaý qalalyq politsiia basqarmasy Shyǵys politsiia bóliminiń bastyǵy Talǵat Ospanovtyń aitýynsha, atalǵan jol-kólik oqiǵasy tirkelip, qazirgi ýaqytta onyń barlyq mán-jaiy anyqtalyp jatyr.
