Jańa salyq erejeleri Qazaqstannyń qurylys salasynan jeke kásipkerlerdiń jappai ketýine sebep bolýda. Qoldanystaǵy zańnamalyq shekteýlerge bailanysty iri qurylys kompaniialaryna jeńildetilgen salyq rejimimen jumys isteitin merdigerlerdi tartý qarjylyq turǵydan tiimsiz bolyp qaldy, dep habarlaidy Ult.kz «31 arnaǵa» silteme jasap.
Naryq qatysýshylarynyń málimetinshe, sońǵy bir jylda qurylys sektoryndaǵy jeke kásipkerler sany shamamen 11%-ǵa azaiǵan. Bul eń aldymen buryn iri developerlerge kelisimshartpen qyzmet kórsetip kelgen tar beiindi mamandar men shaǵyn brigadalarǵa — sylaqshylarǵa, boiaýshylar men montajdaýshylarǵa keri áserin tigizdi.
Mýmkindiktiń shektelýine qurylys kompaniialarynyń korporativtik tabys salyǵyn (KTS) esepteý kezinde jeńildetilgen rejimdegi merdigerlerdiń shyǵyndaryn burynǵydai tolyq kólemde shegerimge ustai almaýy sebep bolyp otyr. Qazaqstan Qurylysshylar odaǵy prezidentiniń orynbasary Viacheslav Lazarevtiń baǵalaýynsha, keibir kompaniialarda mundai kásipkerlerdiń úlesi 50%-ǵa deiin jetetin. Nátijesinde qosymsha salyqtyq aýyrtpalyq qurylys-montajdaý jumystarynyń ózindik qunyn orta eseppen 10–15%-ǵa qymbattatyp jiberdi.
Qalyptasqan jaǵdai túpkilikti satyp alýshylardyń qaltasyna birden salmaq túsirdi: jyl basynan beri elimizde baspananyń bir sharshy metri 13%-dan astam qymbattady.
Sala sarapshylary tyǵyryqtan shyǵý úshin qurylys salasyndaǵy JK-lardyń arnalǵan bólek arnaiy rejim engizýdi usynýda. Degenmen, jyljymaityn múlik jónindegi sarapshy Aleksandr Paktyń pikirinshe, tipti salyqtyq jeńildikter berilgenniń ózinde páter baǵasy arzandamaidy, tek onyń ary qaraiǵy ósý qarqyny báseńdeýi múmkin. Taldaýshylar jyl sońyna deiin turǵyn úi baǵasy infliatsiia deńgeiine sai ósýin jalǵastyrady dep boljap otyr.
