Qazaqstanda azamattardyń ósimpuldaryn esepten shyǵarý boiynsha salyq raqymshylyǵynyń qorytyndysy shyǵaryldy. Osy oraida 1 mln-nan astam adamnyń 2 mlrd teńge qaryzy keshirildi. Bul týraly Qarjy ministrligi Memlekettik kirister komitetinen málim boldy, dep habarlaidy "Ult aqparat".
«Memlekettik kirister komiteti 2020 jylǵy 31 jeltoqsanda jeke tulǵalarǵa múlik salyǵy, jer salyǵy jáne kólik quraldary salyǵy boiynsha salyq raqymshylyǵy aiaqtalǵanyn habarlaidy. Jeke tulǵalar úshin ósimpuldy esepten shyǵarý boiynsha salyqtyq raqymshylyq Qazaqstan Respýblikasynyń 2020 jylǵy 2 shildedegi zańyna sáikes júrgizildi. Esepten shyǵarýdyń basty sharty salyq boiynsha negizgi qaryz somasyn tóleý boldy.
Ósimpuldy esepten shyǵarý úshin eshqaida barýdyń qajeti joq edi. Qaryzdyń negizgi somasyn tóleý jetkilikti boldy jáne ósimpul avtomatty túrde esepten shyǵaryldy», - delingen komitet málimetinde.
Máselen, 2020 jylǵy 1 qańtardaǵy jaǵdai boiynsha 21 697 164 206 teńge negizgi qaryzy jáne 4 254 324 271 teńge mólsherinde ósimpul somasy bar 1 513 879 azamattyń salyq raqymshylyǵyna qatysýǵa quqyǵy bar bolatyn.
Jyl qorytyndysy boiynsha ósimpuldy esepten shyǵarý sharasyn 1 057 764 azamat (70%) paidalandy, olar boiynsha 14 849 385 721 teńge (68%) mólsherinde negizgi borysh somasy tólendi jáne 2 050 503 348 teńge (48%) somasynda ósimpul esepten shyǵaryldy.
Memlekettik kirister komiteti ósimpuldardy esepten shyǵarý boiynsha aktsiia qorytyndysyna sáikes 1 mln-nan astam azamattyń 2 mlrd teńge qaryzyn esepten shyǵardy.
Vedomstvo málimetinshe, 2020 jylǵy salyq raqymshylyǵyn paidalanǵandardyń sany boiynsha nátijeler 2019 jylǵy ótken salyq raqymshylyǵynyń nátijelerinen asyp túsken (2020 jyly 1,1 mln azamat, 2019 jyly 755,7 myń azamat nemese 300,0 myń adamǵa kóp).
