Búgin QR Premer-Ministri Baqytjan Saǵyntaev Memleket basshysynyń tapsyrmasy boiynsha Ońtústik Qazaqstan oblysyna keldi. Úkimet basshysy óńirde Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» Joldaýlary men Bes áleýmettik bastamasynyń júzege asyrylý barysymen tanysatyny kútilýde. Bul týraly primeminister.kz saitynda habarlandy.
Jumys sapary barysynda birqatar óndiristik nysandarǵa barý josparlanyp otyr. QR Premer-Ministrine indýstriialyq-innovatsiialyq damý, «Nurly jer», agroónerkásiptik keshendi damytý sekildi memlekettik baǵdarlamalardyń iske asyrylý qarqyny týraly baiandalady, sondai-aq Indýstriia 4.0 elementterin engizý nátijeleri usynylady.
Kestedegi negizgi is-sharalar - biznes ókilderimen, oblystyń jumys aktivimen, aýyl sharýashylyǵy taýaryn óndirýshilermen, densaýlyq saqtaý qyzmetkerlerimen jáne stýdent jastarmen kezdesýler bolady.
Atap aitqanda, «Jabai ata» JShS jáne «Saryaǵash jer syiy» JShS agroónerkásiptik kásiporyndaryn aralaý qorytyndysy boiynsha Baqytjan Saǵyntaev aýyl sharýashylyǵy taýarlaryn óndirýshilermen AÓK memlekettik baǵdarlamasyn jáne Prezidenttiń «Shaǵyn nesie berýdi kóbeitý» tórtinshi áleýmettik bastamasyn iske asyrý máselelerin talqylaidy.
Oblystyq klinikalyq aýrýhananyń jańartylǵan infraqurylymymen tanysqannan keiin ótetin «dóńgelek ústelde» óńirdiń densaýlyq saqtaý júiesin jańǵyrtý jáne salany qaita retteý sharalary, MJÁ jáne jeke qyzmetter sektoryn damytý máseleleri egjei-tegjeili qaralatyny kútilýde.
Shymkenttiń JOO-lary men kolledjderiniń basshylyǵy men stýdentteri, stýdenttik uiymdardyń kóshbasshylary QR Premer-Ministri Baqytjan Saǵyntaevpen Prezidenttiń bes áleýmettik bastamasyn iske asyrý aiasynda joǵary bilimniń qoljetimdiligi men sapasyn arttyrý, stýdentterdiń jataqhanada turý jaǵdailaryn jaqsartý jónindegi jańa quraldardy talqylaidy.
Sapar sońynda oblystyń jumys aktivteri men biznes ókilderimen kezdesý ótedi. Kún tártibinde: óńirdi áleýmettik-ekonomikalyq damytý máseleleri, onyń ishinde investitsiialar tartý, shaǵyn jáne orta biznesti damytý, indýstriialandyrý, tehnologiialyq jańǵyrtý jáne Indýstriia 4.0, tsifrlandyrý, jumys oryndaryn ashý jáne ózin-ózi jumyspen qamtyǵandardy resimdeý máseleleri.
