Almaty ákimi Baqytjan Saǵyntaevtyń tóraǵalyǵymen ótken jumys keńesinde megapolistegi kógaldandyrý men kóshetterdi kútip ustaýdyń ózekti máseleleri qaraldy, dep habarlaidy QazAqparat.
Almatyda biylǵy kóktemde 50 myńnan astam aǵash otyrǵyzyldy. Jaqyn arada taǵy 15 myńǵa jýyq kóshet otyrǵyzylady. Jalpy, biyl kúzgi maýsymda Jasyl Almaty baǵdarlamasy aiasynda qalanyń jasyl qoryn 290 myń aǵashqa kóbeitý josparda.
Mysaly, qala ákimi Baqytjan Saǵyntaevtyń jumys saparynyń birinde aitylǵan ári Alataý aýdanynyń «Nurkent» jáne «Aqbulaq» shaǵyn aýdandary turǵyndarynyń tilekterine sai Rysqulov dańǵyly boiyndaǵy bólý jolaǵy kógaldandyrylady, munda 650 qaraǵash otyrǵyzyldy.
Jetisý aýdanynyń «Kókjiek» shaǵyn aýdanynda 8 450 aǵash otyrǵyzyldy, onyń ishinde piramidaly terek, kúmis terek, sondai-aq jemis aǵashtary – «altyn keremet», «amerikanka», «limonka» syndy alma aǵashtary men Nikitinskii órigi.
«Jasyl aýla» aktsiiasy aiasynda 109 mekenjai turǵyndaryna 1500 japyraqty kóshet taratyldy.
Keńes barysynda Almaty ákimi Baqytjan Saǵyntaev jasyl jelekterdi kútip ustaýǵa baqylaýdy kúsheitýdi, kóshetter men burynnan bar aǵashtardy, sondai-aq gúlzarlar men gazondardy sýarýdy tapsyrdy.
Qala ákiminiń tapsyrmasy boiynsha ótken jyldan bastap aýmaqtardy kógaldandyrý kezinde gúlderdiń kópjyldyq túrlerine basa nazar aýdaryldy. Biylǵy kóktemde gúlzarlar men klýmbalardy jasaǵanda kópjyldyq ósimdikterdiń jalpy alańy 42% -ǵa jetkizildi, bul ótken jylmen salystyrǵanda 30% -ǵa artyq. Keler jyly kópjyldyq ósimdikterdiń úlesin 55%-ǵa deiin arttyrý josparlanýda.
Megapolis basshysy qalalyq keńistikti kógaldandyrý kezinde landshaftty dizain jónindegi mamandardyń usynysyn eskerý qajettigine nazar aýdardy.
