Búgin Úkimetiniń otyrysynda QR Premer-Ministri Baqytjan Saǵyntaev malmen kún kórip otyrǵan aýyl halqyna júieli qoldaý kórsetýdi tapsyrdy. Bul týraly QazAqparat jazdy.
«Negizinen aýyldyń halqy - eńbekqor halyq. Esiginiń aldynda bes-alty telim jerinde maly bar. Tań atqannan, kesh batqanǵa deiin qybyrlap jumysyn jasaidy. Sol sebepten osy eńbegin ary qarai jalǵastyrý úshin olarǵa tolyǵymen múmkindikter berý kerek. Ol birinshiden, qarjylai kómek, jańa atap óttik, mikronesieler berip, jumys oryndaryn ashý, qajetti malyn qosymsha satyp alý, infraqurylym jaǵynan kómek kórsetý, óndirgen ónimin ary qarai óńdeýshi kásiporyndarǵa jetkizý, iaǵni jan-jaqty qoldaý kórsetý. Uiymdastyrýshylyq jaǵynan da kóptegen kómekter qajet. Ákimdikter tarapynan da edáýir kómek kórsetilý tiis», - dedi Úkimet basshysy.
B.Saǵyntaevtyń aitýyna qaraǵanda, aýyl sharýashylyǵy kooperativterin damytý maqsatynda salyq máselelerin sheshý qajet.
«Salyq salasynan kóptegen kedergiler bolatyn bolsa, árine, qoiylǵan jospar iske aspaidy. Berilgen tapsyrma oryndalmaidy. Sol sebepten Aýyl sharýashylyǵy ministrligi Ulttyq ekonomika ministrligimen birlese otyryp, aitylyp otyrǵan máselelerdiń barlyǵyn birjaqty sheshimge keltirýi qajet. Kezinde AShM tarapynan kóp jumys jasalǵan bolatyn. Mysaly, ár óńirde óziniń mamandanǵan salalaryn jasaý jóninde. Ár óńirde qýattyń júktemesi qanshalyqty jumys istep turǵany, qansha paiyz istep tur, onyń barlyǵy boiynsha málimetter jasalǵan, ony biz de, óńirdegi ákimder de jaqsy biledi, osyǵan bailanysty bir júiege keltirý jumysyn jalǵastyrý qajet, Asqar Isabekuly (QR Premer-Ministriniń orynbasary - Aýyl sharýashylyǵy ministri Asqar Myrzahmetov) osy jumysty ózińiz qolǵa alyp, baqylaýdy kúsheitýdi suraimyn», - dep tapsyrdy Premer-Ministr.
Aita keteiik, Úkimet otyrysynda aýyl halqyn mikronesiemen qamtý jáne aýyl sharýashylyq kooperativterin qurý jaiy sóz boldy.
Osylaisha, ákimdikter maquldaǵan josparlarǵa sáikes aǵymdaǵy jyldyń sońyna deiin 150 aýyl sharýashylyǵy kooperativi uiymdastyrylady. Olar 100 sút qabyldaý pýnkttin jáne 2 myńnan astam otbasylyq bordaqylaý alańyn biriktiretin bolady.
Budan bólek, jeke qosalqy sharýashylyqtar men aýyl sharýashylyǵy kooperativterin qoldaýǵa baǵyttalǵan qarjylyq quraldar máselesi de kóterildi. Jańa qarjylyq quraldar eń aldymen, aýyl sharýashylyǵy kooperativterin damytýǵa baǵyttalǵan. Atap aitqanda, Yntymaq - aýyl sharýashylyǵy kooperativterin damytý, Igilik - aýyl sharýashylyǵy maldaryn ósirý, Birlik - sút qabyldaý pýnktterin qurý, Bereke - otbasylyq bordaqylaý alańdary.
Óz kezeginde, atalǵan maqsattar úshin Úkimet buǵan deiin 31,8 mlrd. teńge qarajat bólgen edi.
«Aýyl sharýashylyǵy kooperativteriniń mikronesielerge qol jetimdiligin qamtamasyz etý úshin JQJ-2020 bekitý boiynsha Úkimet qaýlysyna bir mezette beriletin nesie mólsherin 16 mln-ǵa arttyrý jáne nesielendirý merzimin 7 jylǵa deiin uzartýdy qarastyratyn tolyqtyrýlar engizilýde», - dep atap ótti Aýyl sharýashylyǵy vitse-ministri Qairat Aitýǵanov.
