QR bilim jáne ǵylym ministri Erlan Saǵadiev mektep túlekteriniń Ulttyq biryńǵai testileýge daiyn ekenin aitty, - dep habarlaidy kaz.tengrinews.kz tilshisi.
"Jalpy, túlekter jaqsy tapsyryp jatyr. Bizdiń balalar daiyn. Mysaly, synaq testileýdiń qorytyndysy boiynsha tapsyrýshylardyń 4 paiyzy ǵana negizgi deńgeiden óte almady. Barlyǵy durys bolady dep oilaimyn. Barynsha kóp bala joǵary bilim alsyn dep tyrysyp jatyrmyz. Boljam jasamaimyz. Degenmen de, barlyǵy oqýǵa túsedi dep oilaimyn. Másele endi tek granttar jaily bolyp tur. Biz barlyq múmkindikti ashyp jatyrmyz", - dedi Saǵadiev Gýmilev atyndaǵy Eýraziia ulttyq ýniversitetiniń pýnktinde.
Ministrdiń aitýynsha, túlekter osyǵan deiin attestatsiialaýdan sátti ótti, barlyq mektep túlekteri sátti tapsyrdy.
Sondai-aq, osyǵan deiin UBT-nyń jańa formaty engizilgennen keiin "Altyn belgi" alǵandardyń sany eki ese artqany habarlanǵan bolatyn. "Bul birinshi kezekte oqýshylar úshin psihologiialyq jaǵdai jeńildegendikten bolǵan shyǵar. Olar emtihandardy óz mektebinde tapsyra aldy. Ekinshiden, emtihan formaty aýysty, ár pán ár kúni tapsyryldy. Muǵalimder qosymsha suraq qoiyp, jaqsy baǵa alýǵa múmkindik berdi", - degen edi Zeinep Maqsutova "Qazmedia ortalyǵynda" ótken brifing barysynda.
Aita keteiik, búgin Qazaqstanda mektep túlekterine jańa formattaǵy ulttyq biryńǵai testileý bastaldy. UBT 20 maýsym - 1 shilde aralyǵynda ótkiziledi. Biylǵy testileý alǵash ret jańa formatta ótedi. Mektep túlekteri testterdi 165 UBT ótkizý pýnktinde tapsyrady. Ulttyq testileý ortalyǵynyń málimetinshe, biyl UBT-ǵa qatysýǵa 92 827 túlek niet bildirip, aryz jazǵan. Olar biylǵy mektep bitirýshilerdiń jalpy sanynyń (131 377) 71 paiyzyn qurap otyr.
.jpeg)