"QR Bilim jáne ǵylym ministri Erlan Saǵadiev óz qyzmetkerlerin jumystan ýaqytynda úilerine jiberedi", - dep habarlaidy Ult.kz tilshisi QazAqparat agenttigine silteme jasap.
«Jumystan 18-00-de jiberetin bolamyz. Qoryqpańyzdar. Qazirdiń ózinde biz jumystan dál osy ýaqytta bosatýdamyz. Búginde barlyq sátterdi qarastyryp, kelisýdemiz. Biz ózimiz saǵat 18-00-de jumystan bosatýǵa tyrysamyz. Bizde eńbek zańnamasy talaptaryn barynsha qatań oryndaý týraly nusqaýlyq boldy. Men bul isti Úkimetten bastaýdy usyndym. Óitkeni, egerde ony áýeli Úkimet bastaityn bolsa, soǵan orai qalǵandaryna da birshama jeńil bolar edi. Biz ózimizdiń ministrlikte bul protsesti bastadyq. Bul qandai nátije beretindigin kúteiik», - dedi Saǵadiev «Bolashak Alumni Reunion Conference and Education Fair - 2016 (BARCEF - 2016)» "Bolashaq" baǵdarlamasynyń III halyqaralyq konferentsiiasy asynda BAQ ókilderine bergen suhbatynda.
Aita keteiik, osy aptada ótken Úkimet otyrysynda elimizdiń bilim jáne ǵylym ministri Erlan Saǵadiev memlekettik qyzmetshilerdi úilerine, balalarynyń janyna keshki 6-dan keiin jiberý qajet degen bastama kótergen bolatyn.
«Ata-analardyń balalardy tárbieleýdegi róli men jaýapkershiligi tómendep ketti. Ata-analar únemi jumysta bolǵandyqtan, balanyń tárbiesimen ainalysýǵa ýaqyty bolmaidy. Onyń ishinde memlekettik qyzmetkerler de kóp. Qazirgi ýaqytta tek 10-12 paiyz ata-analar ǵana mekteptegi jinalysqa qatysady. Bizdiń esebimiz boiynsha, ata-analardyń 50 paiyzy 11 jyldyń ishinde mektepterge kelmeidi. Bizdiń oiymyzsha, ata-analardy saǵat 6-dan keiin ýaqytynda úilerine, balalaryna jiberý tájiribesin bastaý qajet», - dedi Saǵadiev.
.jpeg)