Sadyr Japarov Qyrǵyzstan prezidenti qyzmetine resmi túrde kiristi. 28 qańtarda Bishkektegi ulttyq filarmoniiada Japarovtyń inaýgýratsiiasy ótip, memleket basshysy retinde ant berdi. Bul týraly Azattyqtyń Qyrǵyz qyzmeti habarlady.
Prezident retinde alǵash sóz sóilegen Japarov moinyna "óte aýyr jaýapkershilikti" alyp otyrǵanyn atap ótken. Eldiń qiyn jaǵdaida turǵanyn eske salyp, memleket biýdjetiniń qysqarýy, memleket qaryzynyń ósýi, energetika salasyndaǵy daǵdarys máselelerine toqtalǵan. Halyqty máselelerdi birigip sheshýge shaqyrǵan. Ol eldegi barlyq saiasi kúshterdi de birlikke úndedi.
Qyrǵyzstannyń altynshy prezidenti Sadyr Japarovtyń inaýgýratsiiasyna myńnan astam adam - zań shyǵarý, sot, atqarý biliginiń ókilderi, eks-prezidentter, halyqaralyq uiymdar men kórshi elderden kelgen qonaqtar qatysty.
Buǵan deiin inaýgýratsiia rásimine Qazaqsannyń birinshi prezidenti Nursultan Nazarbaev shaqyrylǵany habarlanǵan edi. Alaida Nazarbaevtyń ózi sharaǵa barmady. Onyń quttyqtaý hatyn rásim kezinde Qazaqstan halyqtary assambleiasy tóraǵasynyń orynbasary Janseiit Túimebaev oqyp berdi (Assambleianyń ómir boiǵy tóraǵasy Nazarbaev sanalady).
Sadyr Japarov byltyr qazan aiyndaǵy eldegi parlament sailaýynyń nátijesine qarsylyqtan keiin bilikke kelgen. Qarasha aiynda prezident sailaýyna qatysqysy keletinin málimdep, premer-ministr ókiletinen bas tartqan. Prezident mindetin ýaqytsha atqarýdy da toqtatqan.
10 qańtarda kezekten tys prezident sailaýy ótip, oǵan 17 kandidat qatysqan. Sailaýdyń resmi nátijesi boiynsha, Sadyr Japarovqa sailaýǵa qatysqandardyń 79,20 paiyzy daýys bergen. Japarov keńsesi úkimet úiinde ornalasady. Osyǵan deiin prezidentter jogorký keńesh ǵimaratynda istep kelgen edi.
