Saiasi qýǵyn-súrgin qurbandaryn tolyq aqtaý jónindegi memlekettik komissiia múshesi Sabyr Qasymovtyń aitýynsha, 1916-1930 jyldary zorlyq-zombylyq saiasi naýqandary men asharshylyqtyń saldarynan qurban bolǵandar jaily zertteý jumysyn kúsheitý qajet, dep habarlaidy QazAqparat.
Bul jaily ol Shyǵys Qazaqstan oblysynyń ákimdigi men Saiasi qýǵyn-súrgin qurbandaryn tolyq aqtaý jónindegi memlekettik komissiianyń jobalyq keńsesi ótkizgen respýblikalyq seminarda aitty.
«Stalindik rejimniń kesirinen halqymyz bastan keshken bul zobalań esh ýaqytta umytylmaidy. Alaida osy taqyrypta Qazaqstan táýelsizdik jyldarynda birde bir úkimettik sheshim qabyldaǵan joq. Sol jyldary milliondaǵan adam óz jerinen qashýǵa májbúr boldy. Búgin bul máseleni jan-jaqty zertteýdi birinshi ret bastap otyrmyz. Prezident Qasym-Jomart Toqaevtyń «Saiasi qýǵyn-súrgin qurbandaryn tolyq aqtaý týraly» jarlyǵyna sáikes, memlekettik komissiia jan-jaqty zertteý men ońaltý boiynsha usynystar engizý úshin arnaiy top qurdy. Osyndai toptar aimaqtyq komissiialarda da quryldy», - dedi Sabyr Qasymov.
Onyń aitýynsha, saiasi qýǵyn-súrginge ushyraǵandar naqty qandai qiyndyq kórgenin, ashtyqtan, sýyqtan jáne aýrýdan qansha adam kóz jumǵanyn zertteý jumysyn kúsheitý qajet.
«Sondai-aq elden ketip, qaityp oralǵandarǵa jergilikti bilik pen halyqtyń kózqarasy qandai bolǵany, qazaq bosqyndaryn olar qalai qarsy alǵany týraly muqiiat zertteý júrgizgen jón. Arhiv qujattarynan belgili bolǵandai, bosqyndar Novosibirde, Ombyda, Barnaýlda jáne Reseidiń basqa qalalarynda ashtyqtan ólmeý úshin kez kelgen jumys isteýge májbúr bolǵan. Al Qyrǵyzstanǵa 100 myńǵa jýyq qazaq kóship bardy. Olar burynǵy Frýnze, qazirgi Bishkek qalasynda qiyn jaǵdaida ómir súrdi», - dedi Saiasi qýǵyn-súrgin qurbandaryn tolyq aqtaý jónindegi memlekettik komissiia múshesi.
