Aqmola oblysynyń Aqkól aýdanynda sábiiniń abaisyzda qaza bolýyna sebep bolǵan áielge sot úkimi shyqty. Ol 1 jyl 6 aiǵa bas bostandyǵyn shekteý jazasyna kesildi, dep habarlaidy ult.kz.
Isti Aqkól aýdandyq soty Qylmystyq kodekstiń 104-babynyń 1-bóligimen, iaǵni abaisyzda adam ólimine ákep soǵý deregi boiynsha qaraǵan.
Sot málimetinshe, áiel qonaqta alkogol iship, keiin úiine qaitqan. Túnde mas kúiinde sábiin emizip otyryp uiyqtap qalǵan. Tańerteń oianǵanda balasynyń tirshilik belgisi joq ekenin baiqaǵan.
Oqiǵa ornyna kelgen jedel járdem qyzmetkerleri sábidiń tunshyǵýdan kóz jumǵanyn anyqtaǵan.
Qylmystyq is sotqa kináni moiyndaý týraly protsestik kelisimmen túsken. Prokýror áielge bas bostandyǵyn shekteý jazasyn taǵaiyndaýdy suraǵan.
Sot jaza taǵaiyndaý kezinde áieldiń jasaǵan isine shyn ókingenin jeńildetetin mán-jai retinde eskerdi. Al qylmys kezinde alkogoldik masań kúide bolǵany jaýaptylyqty aýyrlatatyn faktor retinde tanyldy.
Nátijesinde áiel 1 jyl 6 aiǵa bas bostandyǵyn shekteý jazasyna kesilip, oǵan probatsiialyq baqylaý belgilendi.
Úkim ázirge zańdy kúshine engen joq.
