Ózbekstan Ulttyq qaýipsizdik qyzmetiniń (UQQ) ornynan alynǵan basshysy Rýstam Inoiatov prezidenttiń saiasi-quqyqtyq máseleler boiynsha memlekettik keńesshisi qyzmetine taǵaiyndaldy. Ózbekstan prezidenti baspasóz qyzmetiniń habarlaýynsha, prezident Shavkat Mirziiaev Rýstam Inoiatovty jańa qyzmetke 31 qańtarda taǵaiyndaǵan.
UQQ-ny 23 jylǵa jýyq ýaqyt basqarǵan 73 jastaǵy Rýstam Inoiatovtyń ornynan alynǵany 31 qańtarda málim bolǵan. Onyń ornyna osyǵan deiin bas prokýror qyzmetin atqarǵan Ihtier Abdýllaev taǵaiyndalǵan.
«Ózbekstan Respýblikasy Konstitýtsiiasynyń 93 baby, 24 tarmaǵyna sáikes, Ózbekstan Respýblikasy prezidentiniń 2018 jyldyń 31 qańtaryndaǵy №ÝP-5317 jarlyǵyna sáikes, Rýstam Rasýluly Inoiatov Ózbekstan Respýblikasynyń Ulttyq qaýipsizdik qyzmetiniń basshysy laýazymynan bosatylyp, Ózbekstan Respýblikasy Prezidentiniń saiasi-quqyqtyq máseleler boiynsha memlekettik keńesshisi qyzmetine taǵaiyndaldy»,-delingen Ózbekstan basshysynyń jarlyǵynda.
Ózbekstan úkimetindegi birneshe derekkózi men úkimetke jaqyn adamdar buǵan deiin Inoiatovtyń 25 qańtar kúni otstavkaǵa ketý týraly prezidentke ótinish bildirgenin habarlaǵan edi.
Rýstam Inoiatov eks-prezident Islam Karimov 2016 jyly qaitys bolǵannan beri qyzmetinen aýystyrylmaǵan joǵary shendi az ǵana sheneýniktiń biri bolǵan edi. Inoiatov basqarǵan 23 jylǵa jýyq ýaqytta Ulttyq qaýipsizdik qyzmeti Ózbekstandaǵy eń jabyq jáne quzyreti joǵary qurylym boldy.
