«Rýhani jańǵyrý» baǵdarlamasynan mazmuny taiaz, maqsaty suiyq kóptegen sharalar alynyp tastaldy. Bul týraly QR Aqparat jáne qoǵamdyq damý vitse-ministri Bolat Tilepov aitty, dep habarlaidy QazAqparat.
«3 jylda «Rýhani jańǵyrý» baǵdarlamasyn basqarýdyń institýtsionaldyq negizi tolyqtai qalyptastyryldy. Barlyq óńirde jobalyq keńseleler ashylyp, ár jerdiń ereksheligine bailanysty mazmundy josparlar quryldy. Árine, kez kelgen bastamanyń baiandylyǵy bul sol bastamaǵa janashyr mamanǵa bailanysty. Sondyqtan da bul máselege úlken kóńil bólinip keledi. Osyǵan orai ministrlik janynan arnaiy qoǵamdyq damý institýtynyń qyzmeti jolǵa qoiyldy. Oǵan ǵylymi-saraptamalyq mindetten bólek óńirlik keńselelerdegi mamandarǵa ádistemelik kómek kórsetý jumysy júktelgen bolatyn», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, baǵdarlamanyń 6 baǵyt boiynsha 13 joba bekitilip, olardyń aiasynda ondaǵan myń sharalar ótti.
«Árine, bul jerde biz úshin mańyzdysy san emes, sapa. Óitkeni, tájiribe kórsetkendei keibir jerlerde eseptilik, naýqanshylyq siiaqty úrdister oryn alǵany jasyryn emes. Bul týraly jyl basynda ótken memlekettik komissiianyń otyrysynda naqty aityldy. Nátijesinde óńirlerdegi barlyq is-sharalarǵa qaita taldaý jasalyp, rýhani jańǵyrýǵa múldem qatysy joq, mazmuny taiaz, maqsaty suiyq kóptegen sharalar alynyp tastaldy. Máselen, byltyrǵy jyldyń josparynda 229 is-shara kózdelgen bolsa, biyl barlyǵy - 97 tarmaq. Bul jerde taǵy da qaitalap aitaiyn, is-sharalardyń sapasyna úlken mán berilip otyr», - dedi Bolat Tilepov.
Vitse-ministr bul mindetti sheshý úshin olardy júzege asyrýdyń 3 baǵyty belgilengendigin aitty.
«Birinshi baǵyt - tulǵalyq damý. Iaǵni, oǵan bilimniń saltanat qurýy, básekege qabilettilik, sananyń ashyqtyǵy, pragmatizm siiaqty qaǵidattar kirdi. Ekinshi baǵyt - bul ulttyq biregeilik pen halyqaralyq mártebeni arttyrý. Úshinshi baǵyt - memlekettiń, azamattyq qoǵamnyń jáne jergilikti qoǵamdastyqtardyń damýy. Al endi osynyń barlyǵyn iske asyrý úshin ortalyq memlekettik organdar men jergilikti atqarýshy organdarǵa arnaiy usynymdar ázirlenip, jetkizildi», - dedi ol.
.jpeg)