Almaty oblysynda «Rýhani jańǵyrý» baǵdarlamasy aiasynda 2017 jyly 1 mln. adamdy qamtyǵan 8 myń shara uiymdastyryldy. Biýdjeti 25,8 mlrd. teńge bolatyn 319 iri jobanyń reestri jasaldy. Bul týraly búgin óziniń esep berý jiynynda oblys ákimi A. Batalov aitty.
Oblys basshysy óz baiandamasynda habarlaǵandai, óńirde «Týǵan jer» jobasy aiasynda quny 10,5 mlrd. teńge bolatyn 218 joba júzege asyrylsa, sonyń 6,6 mlrd. teńgelik 90 jobasy aiaqtaldy. Máselen, «Batyr babalar» memorialdy kesheni salynyp, Elbasynyń «Atameken» tarihi-mádeni ortalyǵy ashyldy. Sonymen qatar Taldyqorǵanda Qazaqstan boiynsha tuńǵysh «Rýhani jańǵyrtý» ortalyǵy boi kóterip, iske qosyldy.
2018 jyly «Rýhani jańǵyrý» baǵdarlamasy sheńberinde quny 6 mlrd. teńgege jýyqtaityn 159 iri jobanyń reestri ázirlendi. Bul oraida «Týǵan jer» jobasy boiynsha Taldyqorǵan qalasynda jabyq bassein, Qarasai, Alakól aýdandarynda dene shynyqtyrý-saýyqtyrý kesheniniń qurylysy júrgizilmek. Sol siiaqty Panfilov aýdanynda «Orbulaq» memorialdy kesheni turǵyzylady.
