Rishi Sýnak Britaniianyń konservatorlar partiiasynyń jetekshisi bolyp sailandy. Bul onyń aldaǵy kúnderi Ulybritaniia premer-ministri bolatynyn bildiredi. Sýnak qaýymdar palasyndaǵy konservatorlardyń kópshilik daýysyn aldy. Onyń básekelesi, qaýymdar palatasyndaǵy konservatorlar jetekshisi Penni Mordont jarystan shyǵatynyn habarlady. Buǵan deiin burynǵy premer-ministr Boris Djonson da básekeden bas tartqan, dep jazady Azattyq.
Sýnak nebári 44 kún premer bolyp, otstavkaǵa ketken Liz Trasstyń ornyna keledi.
Bolashaq premer taiaý kúnderi qaýymdar palatasynda resmi málimdeme jasaidy. Konservatorlar partiiasynyń jetekshiligi Sýnaktyń partiia tóraǵalyǵyna sailaýynda qalǵan jalǵyz kandidat ekenin qazirdiń ózinde rastap otyr, demek ol avtomatty túrde premer bolady degen sóz.
42 jastaǵy Rishi Sýnak Ulybritaniianyń arǵy tegi ońtústik aziialyq alǵashqy premer-ministri bolady. Onyń ata-anasy 1960 jyldary Shyǵys Afrikadan Ulybritaniiaǵa emigratsiamen kelgen úndiler. Sýnak Oksford pen Stenfordta oqyǵan, sonda júrip úndi milliarderiniń qyzy Akshat Mýrtimen tanysyp, úilengen. Oqýyn aiaqtaǵan soń Goldman Sachs investitsiialyq bankinde jumys istegen. Qazir áieli ekeýi Britaniia bailarynyń reitinginde 222-shi orynda tur. Eki qyzy bar.
Sýnak 2015 jyldan beri qaýymdar palatasyna úsh ret sailanǵan. 2016 jyly Ulybritaniianyń Eýropa odaǵynan shyǵaratyn Brekzitti qoldaǵan. 2019 jyly Ulybritaniia premer-ministri úshin kúreste Boris Djonsondy qoldaǵan. Djonson jeńgen soń Sýnak Ulybritaniia qazynashylyǵynyń bas hatshylyǵyna taǵaiyndalǵan, 2020 jyldyń aqpanynan osy ministrlikti basqardy.
Sarapshylar Sýnak qarjy ministri retinde Ulybritaniia COVID-19 indetinen sátti alyp ótti dep sanaidy. 2022 jyly shildede Djonsonnyń ekonomikalyq saiasatymen kelispei otstavkaǵa ketken. Sarapshylar Djonson úkimetiniń quldyraýyna Sýnaktyń qyzmetinen ketkeni de áser etti dep baǵalaǵan.
20 qazanda Liz Trass Ulybritaniia premer-ministri qyzmetinen otstavkaǵa ketken. Ol nebári 44 kún ǵana premer boldy. Sýnak onyń negizgi básekelesi bolǵan edi.
