Tanymal aitysker aqyn Rinat Zaiytov ShQO, Aiagóz aýdanyndaǵy sý tasqynynan zardap shekken otbasylarǵa kómek qolyn sozdy. Bul týraly "Aiagóz jańalyqtary" gazetiniń bas redaktory Ermek Daiyrbaev jazdy.
"Aqyn - eldiń joqshysy. Buryn da solai, qazir de osy. Sonaý Súiinbai babalarymyz bastaǵan aitys óneriniń uly kóshin jalǵap júrgen búgingi aitys aqyndary kóshiniń ortasynda jerlesterimiz az emes. Solardyń biri Rinat Zaiytov. Eldiń jaiyn, halyqtyń muńyn sahnanyń tórinen aitqanda bir serpilmeitin tyńdarman joq shyǵar. Týǵan jurtym, asyl ǵurpym, ulttyq múddem, tilim, dilim dep topqa túsip, biik rýhtyń keremet úlgisin kórsetip júrgen Rinat Aiagózdiń týmasy", - deidi Ermek Daiyrbaev.
"Aiagóz jańalyqtary" gazetiniń bas redaktory Rinat aqynynyń azamattyq qasietin tilge tiek ete otyryp, ózi týyp-ósken Aiagóz aýdanyndaǵy sý tasqynynan zardap shekkken otbasylardyń jaǵdaiymen tanysyp, kómek kórsetkenin aitady.
"Jaqynda týǵan jerinde sý tasqyny oryn alǵan jaǵdaiǵa orai, jerlesteriniń jai – kúiimen tanysý úshin Aiagózge arnaiy at basyn burǵan Rinat, el arasynda boldy. Bar jiǵan tergenin baspanasymen qosa tasqyn sý aǵyzyp áketken aǵaiynǵa óziniń izgi nietin bildirdi. Jaǵdaiǵa bailanysty jinalǵan qarajattan baspanaly bolǵan on bes otbasynyń shańyraqtaryna arnaiy baryp aldaǵy ýaqytta jandaryńyz jaýrap, tabandaryńyzdan syz ótpesin dep qaly kilemder syilady. Jańadan alǵan shańyraqtaryna aqyn uldary arnaiy kelip jatqan aǵaiyn riiasyz kóńilderinen rizashylyqtaryn aityp, alǵystaryn bildirdi. Ulymyz saǵan tartsa dep yrymdaǵan otbasylardyń búldirshinderiniń mańdaiynan iiskegen aqyn aǵalary balapandarǵa aq tilegin jetkizdi", - deidi ol.
Al Rinat Zaiytov: «Ár kimge týǵan jeri Mysyr shahary deidi ǵoi. Men úshin de Aiagózdiń orny erekshe. Eldegi jaidy estip qabyrǵam qaiysty. Eń bastysy halqymyz aman, elimiz berekeli bolsyn» degen igi tilegin joldady.
