تانىمال ايتىسكەر اقىن رينات زايىتوۆ شقو, اياگٶز اۋدانىنداعى سۋ تاسقىنىنان زارداپ شەككەن وتباسىلارعا كٶمەك قولىن سوزدى. بۇل تۋرالى "اياگٶز جاڭالىقتارى" گازەتٸنٸڭ باس رەداكتورى ەرمەك دايىرباەۆ جازدى.
"اقىن - ەلدٸڭ جوقشىسى. بۇرىن دا سولاي, قازٸر دە وسى. سوناۋ سٷيٸنباي بابالارىمىز باستاعان ايتىس ٶنەرٸنٸڭ ۇلى كٶشٸن جالعاپ جٷرگەن بٷگٸنگٸ ايتىس اقىندارى كٶشٸنٸڭ ورتاسىندا جەرلەستەرٸمٸز از ەمەس. سولاردىڭ بٸرٸ رينات زايىتوۆ. ەلدٸڭ جايىن, حالىقتىڭ مۇڭىن ساحنانىڭ تٶرٸنەن ايتقاندا بٸر سەرپٸلمەيتٸن تىڭدارمان جوق شىعار. تۋعان جۇرتىم, اسىل عۇرپىم, ۇلتتىق مٷددەم, تٸلٸم, دٸلٸم دەپ توپقا تٷسٸپ, بيٸك رۋحتىڭ كەرەمەت ٷلگٸسٸن كٶرسەتٸپ جٷرگەن رينات اياگٶزدٸڭ تۋماسى", - دەيدٸ ەرمەك دايىرباەۆ.
"اياگٶز جاڭالىقتارى" گازەتٸنٸڭ باس رەداكتورى رينات اقىنىنىڭ ازاماتتىق قاسيەتٸن تٸلگە تيەك ەتە وتىرىپ, ٶزٸ تۋىپ-ٶسكەن اياگٶز اۋدانىنداعى سۋ تاسقىنىنان زارداپ شەكككەن وتباسىلاردىڭ جاعدايىمەن تانىسىپ, كٶمەك كٶرسەتكەنٸن ايتادى.
"جاقىندا تۋعان جەرٸندە سۋ تاسقىنى ورىن العان جاعدايعا وراي, جەرلەستەرٸنٸڭ جاي – كٷيٸمەن تانىسۋ ٷشٸن اياگٶزگە ارنايى ات باسىن بۇرعان رينات, ەل اراسىندا بولدى. بار جيعان تەرگەنٸن باسپاناسىمەن قوسا تاسقىن سۋ اعىزىپ ەكەتكەن اعايىنعا ٶزٸنٸڭ ٸزگٸ نيەتٸن بٸلدٸردٸ. جاعدايعا بايلانىستى جينالعان قاراجاتتان باسپانالى بولعان ون بەس وتباسىنىڭ شاڭىراقتارىنا ارنايى بارىپ الداعى ۋاقىتتا جاندارىڭىز جاۋراپ, تاباندارىڭىزدان سىز ٶتپەسٸن دەپ قالى كٸلەمدەر سىيلادى. جاڭادان العان شاڭىراقتارىنا اقىن ۇلدارى ارنايى كەلٸپ جاتقان اعايىن ريياسىز كٶڭٸلدەرٸنەن ريزاشىلىقتارىن ايتىپ, العىستارىن بٸلدٸردٸ. ۇلىمىز ساعان تارتسا دەپ ىرىمداعان وتباسىلاردىڭ بٷلدٸرشٸندەرٸنٸڭ ماڭدايىنان يٸسكەگەن اقىن اعالارى بالاپاندارعا اق تٸلەگٸن جەتكٸزدٸ", - دەيدٸ ول.
ال رينات زايىتوۆ: «ەر كٸمگە تۋعان جەرٸ مىسىر شاھارى دەيدٸ عوي. مەن ٷشٸن دە اياگٶزدٸڭ ورنى ەرەكشە. ەلدەگٸ جايدى ەستٸپ قابىرعام قايىستى. ەڭ باستىسى حالقىمىز امان, ەلٸمٸز بەرەكەلٸ بولسىن» دەگەن يگٸ تٸلەگٸن جولدادى.
