QR Energetika ministri Bolat Aqsholaqov «Atameken Business» tilshisiniń saýalyna bergen jaýabynda Qazaqstannyń gaz máselesi boiynsha Resei jáne Ózbekstanmen tyǵyz yntymaqtastyqta ekenin, biraq eshqandai «gaz odaǵyn» qurý máselesi talqylanbaǵanyn aitty, dep habarlaidy Azattyq Ruhy.
«Biz gaz odaǵy týraly kelissózder júrgizbegenimizdi taǵy bir naqtylap aitamyn. Biz tek ekijaqty áńgime-dúken qurdyq. Meniń ol jaqqa (Resei Federatsiiasyna. – red.) jii baratynymdy jaqsy bilesizder, men soltústik-shyǵysty gazdandyrýǵa qatysty máselelerdi sheshýge tyrysamyn. Bul – Resei Federatsiiasymen ekijaqty qarym-qatynastaǵa negizdeletin másele. Muny bir deńiz.
Ekinshiden, Ózbekstanmen de solai, iaǵni biz aziialyq gaz qubyrynyń bir júiesine – bizge qosylǵan búkil gaz qubyry júiesin retteýge kiremiz. Úshinshiden, Ózbekstannyń Resei Federatsiiasymen gaz máselesi boiynsha óz qarym-qatynasy bar, bizde ondai másele joq. Olar sol máselelerdi sheship jatyr. Keide úsh jaq qatar otyryp sóilesýge týra keletin jaǵdailar bolady. Biraq bul odaq qurý kerek degendi bildirmeidi», - dep jaýap berdi Aqsholaqov.
Aita ketsek, Prezidenttiń baspasóz qyzmeti Qasym-Jomart Toqaevtyń Máskeýge sapary kezinde «úshjaqty gaz odaǵyn» qurý týraly usynys aitylǵanyn, atalǵan másele boiynsha utymdy sheshim qabyldaý úshin úsh eldiń sarapshylarynyń qatysýymen egjei-tegjeili kelissózder júrgizilýi qajettigin málimdegen bolatyn. Keiinirek QR SIM Máskeýdiń odaq qurý týraly bastamasyn «ázirshe muqiiat zerdeleýge tiis ideia ǵana» dep túsindirip, Qazaqstan sanktsiialardy ainalyp ótý úshin óz aýmaǵyn paidalanýǵa jol bermeidi dep sendirdi.
Osy oraida, BAQ-ta Ózbekstannyń «úshjaqty gaz odaǵyn» qurýdan bas tartqany týraly aqparat tarady.
