Reseilik "Spýtnik V" vaktsinasyn qarjylandyrýshylar men jasaýshylar halyqaralyq naryqta ekpeniń eki dozasy 20 dollardai bolady, al reseilikter tegin alady dep málimdedi. Bir adam bul ekpeniń eki dozasyn alýy tiis. Reseilik ekpeniń álemdik naryqtaǵy baǵasy 24 qarashada jariialandy.
"Spýtnik V" ekpesi Pfizer vaktsinasynan (eki dozasy 31 eýro) arzan, biraq Oksford pen AstraZeneca vaktsinasynan (bir dozasy 3 dollar) qymbat.
Reseidiń táýelsiz qory (RFPI) málimdemesinde Máskeý men onyń sheteldegi seriktesteri kelesi jyly 500 mln adamǵa jetetin bir milliardtan asa doza jasaýǵa qaýqarly dep málimdedi.
24 qarashada RFPI, Resei densaýlyq saqtaý ministrligi jáne "Spýtnik V" vaktsinasyn jasaǵan memleket qarjylandyratyn Gamalei atyndaǵy ulttyq ortalyq ekpe 28 kúnnen soń 91,4 paiyz, 42 kúnnen soń 95 paiyz tiimdilik kórsetkenin málimdedi.
Olar synaq kezinde 22 myń erikti bir doza, 19 myń erikti eki doza alǵanyn málimdedi. Gamalei atyndaǵy ortalyqtyń dereginshe, synaq Resei, BAÁ, Venesýela, Belarýste ótken.
Osyǵan deiin amerikalyq-germaniialyq Pfizer/BioNTech, amerikalyq Moderna jáne Angliiada Oksford pen AstraZeneca ózderiniń vaktsinasy 95 paiyz tiimdilik kórsetkenin málimdegen.
16 qarashada Qazaqstan prezidenti Qasym-Jomart Toqaev koronavirýspen kúres boiynsha jiynda elde reseilik vaktsinany daiyndaityn zaýyt salý jospary baryn málimdegen.
