Qazaqstan fýtbol federatsiiasynyń baqylaý, tártiptik jáne etika komiteti Premer-liganyń 23-týry aiasyndaǵy «Aqtóbe» men «Ordabasy» matchynan keiin birqatar sheshim qabyldady, dep habarlaidy ult.kz.
Klýbtar men «Aqtóbe» komandasynyń bas bapkeri Igor Cherevchenkoǵa qarjylyq sanktsiialar salyndy.
Eń úlken aiyppul «Aqtóbe» fýtbol klýbyna taǵaiyndaldy. Komandaǵa matchty tiisti deńgeide uiymdastyrmaǵany, qaýipsizdik talaptaryn buzǵany jáne matchtyń resmi tulǵalarynyń qaýipsizdigin qamtamasyz etpegeni úshin jaza qoldanyldy.
Sonymen qatar klýb direktory B. Dúzelbaevtyń tóreshiler kiim aýystyratyn bólmesine ruqsatsyz kirgeni anyqtalǵan. Osy áreketi úshin klýbqa 300 AEK, iaǵni 1 mln 297 myń 500 teńge aiyppul salyndy.
Al jankúierlerdiń matchtyń resmi tulǵalaryna balaǵat sózder aityp, qarsylas komandaǵa til tigizgeni úshin klýb taǵy 200 AEK (865 myń teńge) tóleýge mindetteldi.
Osylaisha, «Aqtóbe» klýbyna salynǵan aiyppuldyń jalpy somasy 500 AEK nemese 2 mln 162 myń 500 teńge boldy.
Komandanyń bas bapkeri Igor Cherevchenko da diskreditatsiialyq sipattaǵy málimdemeleri úshin 50 AEK, iaǵni 216 myń 250 teńge aiyppul tóleidi.
Al «Ordabasy» klýbyna komandanyń kiim aýystyratyn bólmeden kesh shyǵýyna bailanysty matchtyń úsh minýtqa kesh bastalǵany úshin 60 AEK (259 myń 500 teńge) aiyppul salyndy.
Barlyq aiyppuldy 20 qarashaǵa deiin tóleý qajet.
Matchtan keiin janjal týyndaǵan edi
Aita keteiik, osy matchtan keiin áleýmettik jelilerde «Aqtóbe» klýbynyń kámeletke tolmaǵan jankúier qyzdary ustaǵan plakattyń sýreti tarady. Onda «NO SHYMSIDE, NO TEXAS FANS!» degen jazý jáne Ózbekstan týyna uqsas beine bolǵan. Matchtan keiin jankúierlerdiń bir bóligi «Ózbekter!» dep urandatqan.
Oqiǵa Qazaqstan men Ózbekstanda qoǵamdyq rezonans týdyrdy. Politsiia qyzdardyń jeke basyn anyqtap, ata-analarynyń qatysýymen profilaktikalyq áńgime júrgizdi. Balalardy tárbieleý mindetterin tiisinshe oryndamaǵany úshin ata-analary ákimshilik jaýapkershilikke tartyldy.
Keiin «Aqtóbe» fýtbol klýby ákimshilik aiyppul alǵan alty qyzdyń shyǵynyn óteitinin málimdedi. Klýb kemsitýshilikke qarsy ekenin aityp, qyzdarǵa qoldaý kórsetetinin jetkizdi.
