Qazaq estradasynda bir ǵana ánimen kópshiliktiń yqylasyna bólenip, ónerdegi jańa beleske kóterilgen ánshiler az emes. Keibiri alǵashqy hitiniń arqasynda elge tanylsa, endi biri burynnan jinaǵan aýditoriiasyn eselep, tanymaldyǵyn arttyrdy. Bir kezderi radio men telearnalardan úzdiksiz berilgen bul týyndylardyń birqatary arada jyldar ótse de tyńdarman jadynan óshken joq. Ult.kz óner jolynda erekshe oryn alǵan hit ánderdiń tarihyn, olardyń oryndaýshylarǵa qalai áser etkenin jáne ánshilerdiń óz suhbattarynda aitqan qyzyqty derekterin jinaqtady.
1. Qairat Nurtas – "Arman": Jas ánshini elge tanytqan alǵashqy hit
Qazaq estradasynyń tanymal ókili Qairat Nurtas úshin "Arman" áni shyǵarmashylyq jolyndaǵy alǵashqy úlken tabystardyń biri boldy. 2006 jyly kópshilikke taraǵan týyndy jas ánshiniń esimin elge tanytyp, onyń tyńdarman qataryn kóbeitti. Ánniń sózin de, áýenin de kompozitor Baýyrjan Esebaev jazǵan. Kompozitor 2024 jyly KAZ.NUR.KZ basylymyna bergen suhbatynda bul shyǵarmanyń 2004 jyly ómirindegi qiyn kezeńde dúniege kelgenin aitqan. Sol kezde Almatyǵa jańadan kelgen avtor turaqty jumysy men baspanasy bolmai, rýhani kúizelisti bastan ótkergen. Bastapqyda ándi basqa oryndaýshylarǵa usynǵanymen, keiin Qairat Nurtastyń anasy Gúlzira Aidarbekova habarlasyp, týyndyny ulyna berýdi suraǵan. Sóitip, jas ánshiniń oryndaýyndaǵy "Arman" kópshilikke tarap, onyń shyǵarmashylyq ómirinde jańa kezeń bastaldy.
Gúlzira Aidarbekova NTK telearnasyna bergen suhbatynda sol ýaqytta bul ándi bilmeitin adam az bolǵanyn eske alǵan. Ánniń tanymal bolýy Qairattyń el aralap kontsert berýine jáne úlken sahnaǵa qadam basýyna yqpal etti.
Arada jiyrma jylǵa jýyq ýaqyt ótse de "Arman" ánshiniń alǵashqy tanymaldyǵyn eske túsiretin týyndy retinde atalyp keledi.
2. Meirambek Bespaev – "Boztorǵai": Bala ánshiniń juldyzyn jaqqan týyndy
Meirambek Bespaev bala kúninde oryndaǵan "Boztorǵai" áni arqyly qalyń jurtshylyqtyń yqylasyna bólendi. Jetim balanyń saǵynyshy men muńyn jetkizetin shyǵarmanyń áýenin Altynbek Qorazbaev, sózin Ábdirahman Asylbekov jazǵan. Meirambektiń ónerge kelýine ustazy Altynbek Qorazbaev erekshe yqpal etip, ony bala kezinen sahnaǵa baýlyǵan. Ánshi bir suhbatynda "Boztorǵaidy" oryndamas buryn ustazy ózin jetimder úiine aparyp, ondaǵy balalardyń ómirimen tanystyrǵanyn aitqan. Mundaǵy maqsat jas oryndaýshynyń ándegi qaiǵy men saǵynyshty túsinip, ony tyńdarmanǵa shynaiy jetkizýi bolǵan.
Meirambektiń bala daýsymen shyrqaǵan áni halyqqa qatty áser etip, kópshilik ony "qazaqtyń Boztorǵaiy" dep atai bastady. Tipti ándegi muńdy shynaiy jetkizgeni sonshalyq, keibir tyńdarmandar oryndaýshynyń ózin jetim bala eken dep oilaǵan.
2017 jyly "Tańsholpan" baǵdarlamasyna bergen suhbatynda Meirambek óziniń ónerdegi alǵashqy jetistigi "Boztorǵai" ekenin atap ótken. Keiin ol "MýzArt" tobynyń quramynda óner kórsetip, qazaq estradasyndaǵy tanymal ánshilerdiń birine ainaldy.
2025 jyly "Boztorǵai" áni "Bolmaǵan balalyq shaq" filminiń saýndtregi retinde qaita usynylyp, týyndynyń ómirsheńdigin taǵy bir márte kórsetti.
3. Erke Esmahan – "Qaida?": Milliondaǵan qaralym jinaǵan ánniń qupiiasy
Erke Esmahan 2017 jyly jaryqqa shyqqan "Qaida?" ánimen tanymaldyǵyn jańa deńgeige kóterdi. Buǵan deiin "Ińkár" tobynda óner kórsetip, keiin jeke shyǵarmashylyǵyn bastaǵan ánshi "Allo" dýetimen de kópshiliktiń yqylasyna bólengen edi.
Alaida "Qaida?" áni jaryq kórgennen keiin onyń esimi áleýmettik jelilerde jii atala bastady. NTK telearnasynyń málimetinshe, beinebaian alǵashqy on kúnniń ishinde 2,5 millionnan astam qaralym jinaǵan. Ánniń áýenin jas kompozitor Diana Ismail, al sózin aqyn Qainar Alagózov jazǵan. Diana Ismail Dinara Sátjanǵa bergen suhbatynda týyndyny nebári 15 jasynda jazǵanyn aityp, onyń qyzyqty tarihyn bólisken. Kompozitordyń sózinshe, Erke stýdiiada ándi kezdeisoq estip, keiin ony 250 myń teńgege satyp alǵan.
Al Erke Esmahan Stan.kz basylymyna bergen suhbatynda bul ánniń mazmunyn óziniń ómirimen bailanystyryp túsindirgen. Týyndynyń tabysy ánshiniń tyńdarman qataryn arttyryp qana qoimai, ony áleýmettik jelide keń talqylanatyn óner adamdarynyń birine ainaldyrdy. Osylaisha "Qaida?" Erke Esmahannyń shyǵarmashylyq jolyndaǵy eń tanymal hitteriniń biri bolyp qaldy.
4. Tóreǵali Tóreáli – "Bol janymda": Aitysker aqyndy estradaǵa tanytqan hit
Qazaq estradasynyń tanymal ánshisi Tóreǵali Tóreáliniń óner jolynda "Bol janymda" ániniń orny erekshe. Alǵashynda aitys sahnasynda tanylǵan óner iesi osy týyndy arqyly estrada tyńdarmandarynyń nazaryn aýdardy. Ánniń sózin aqyn Qainar Alagózov, al áýenin kompozitor Qural Moljanov jazǵan. Jaryqqa shyqqannan keiin "Bol janymda" jastar arasynda keńinen taralyp, toi-dýman men túrli basqosýlarda jii oryndala bastady.
Tóreǵali 2015 jyly "Aq jelken" jýrnalyna bergen suhbatynda ánniń qoǵamdyq kólikterde de, toilarda da shyrqalyp júrgenin aityp, onyń halyq arasynda tanylǵanyna toqtalǵan. Ánniń beinebaianyna qatysty da qyzyqty oqiǵa bar: óner iesi "Juldyzdar otbasy" basylymyna bergen suhbatynda klipke bolashaq jary Tolqyndy túsirgisi kelgenin, alaida onyń usynystan bas tartqanyn baiandaǵan.
"Bol janymda" Tóreǵalidiń aitystan bólek, estrada sahnasynda da óz tyńdarmanyn qalyptastyrýyna yqpal etti. Keiin ánshi "Allo" jáne basqa da tanymal týyndylaryn oryndap, shyǵarmashylyq jolyn jalǵastyrdy. Al "Bol janymda" onyń alǵashqy úlken estradalyq jetistikteriniń biri ári halyqqa keńinen tanylýyna jol ashqan án retinde el jadynda qaldy.
5. Abai Begei – "Aspanǵa qaraimyn": Sońǵy úmitke ainalǵan ánniń juldyzdy jaqqan tarihy
Qazaq estradasynyń tanymal ánshisi Abai Begeidiń taǵdyryn ózgertken týyndy – 2013 jyly hitke ainalǵan "Aspanǵa qaraimyn" áni. Óner iesi buǵan deiin birneshe jyl boiy sahnadan óz ornyn tabýǵa tyrysyp, tipti kóligin satyp, otyzǵa jýyq án jazdyrǵanymen, kópshilikke keńinen tanyla almaǵan. Ánshi "1001 tún" baǵdarlamasyna bergen suhbatynda bul týyndyny Ulyqpan Joldasovtyń usynysymen oryndaǵanyn, bastapqyda ánniń ózine unamaǵanyn aitqan. Alaida shyǵarmany basqa topqa beretinin estigen soń, raiynan qaityp, ony 30 myń teńgege satyp alýǵa kelisken. Qaltasynda jetkilikti qarajaty bolmaǵandyqtan, aqshany Aqtaýdaǵy tanys kásipkerden qaryzǵa alǵan.
Bir qyzyǵy, ánniń avtory Dáýir Saǵyndyqov 2024 jyly KAZ.NUR.KZ basylymyna bergen suhbatynda týyndyny 2009 jyly Halyqqa qyzmet kórsetý ortalyǵynda kezdestirgen sulý qyzǵa ǵashyq bolǵan sátinde jazǵanyn baiandaǵan. Abai Begei bolsa, bul ándi sońǵy úmiti sanap, anasynyń syrqattanýyna bailanysty Aqtaýǵa qaityp ketken, alaida arada birneshe ai ótkende teńiz jaǵasyndaǵy dámhanalardan óz ániniń shyrqalyp jatqanyn estigen. Kóp uzamai "Aspanǵa qaraimyn" búkil elge tarap, toi-dýmannyń ajyramas ánine ainaldy, tipti kýbalyq Sin Frontera toby ony ánshimen birge oryndady.
Abai Begei 2017 jyly "Tańsholpan" baǵdarlamasynda osy hitten keiin tanymaldyǵy artyp, turmystyq jaǵdaiy jaqsarǵanyn jáne Kýbada kontsert bergenin aitqan. Osylaisha, bir kezderi sońǵy úmiti bolǵan "Aspanǵa qaraimyn" áni óner iesiniń juldyzyn jaǵyp, esimin qazaqstandyq tyńdarmannyń jadynda qaldyrdy.
Keide bir ánniń ózi óner iesiniń búkil taǵdyryn ózgertýge jetkilikti. Jyldar boiǵy izdenis, tógilgen ter men úzilmegen úmit bir sátte óz jemisin berip, qarapaiym oryndaýshyny halyqtyń súiiktisine ainaldyrady. Alaida hittiń ómiri sahnadaǵy tanymaldyqpen ǵana ólshenbeidi. Ýaqyt ótse de umytylmai, urpaqtan-urpaqqa jetip, tyńdarmannyń qýanyshy men saǵynyshyna ortaq bolǵan án ǵana shyn máninde halyqtyń júreginen oryn alady. Óitkeni juldyzdy bir án tanytýy múmkin, al sol ándi máńgilikke ainaldyratyn – halyqtyń yqylasy.
