Tanymal ánshi, "Jigitter" tobynyń múshesi Baǵlan Ábdiraiymov áleýmettik jelide óziniń qaitys bolǵany týraly aqparat taraǵanyna narazylyq bildirdi. Óner iesi jurtty dúrliktirgen habardan keiin kópshilikke arnaiy úndeý jasady, dep habarlaidy ult.kz.
Oqiǵa ánshi Erdos Qanaevtyń áleýmettik jelidegi jazbasynan keiin bastalǵan. Ol Baǵlan esimdi jaqyn dosynyń dúnieden ótkenin habarlap, marqumnyń amanatyn oryndaǵanyn aitqan. Alaida keibir jeli qoldanýshylary marqumdy ánshi Baǵlan Ábdiraiymovpen shatastyryp, óner iesiniń qaitys bolǵany týraly aqparat tarata bastaǵan.
Bul habardy estigen ánshi tańdanysyn jasyra almady. Onyń aitýynsha, qaiǵyly aqparat taraǵannan keiin tanystary men dostary habarlasyp, jaǵdaiyn surai bastaǵan.
"Assalaýmaǵaleikúm! Týǵan kúnime orai Quran oqyttyq, kókpar berdik. Bári jaqsy ótti, Allaǵa shúkir. Bata aldyq, azamattardy atqa mingizdik. Endi jumysqa kiriseiin dep jatsaq, mynadai habarlamalar kelip jatyr. Men tań qaldym! Tanystarym, dostarym habarlasyp jatyr. Adam shoshityndai aqparat. Osylai jasaýǵa bola ma endi? Qudaiǵa shúkir, tirimiz ǵoi. Áli qanshama ánderim bar, jaryqqa shyqpaǵan. Endi qyzyq bolady", – dedi Baǵlan Ábdiraiymov.
Ánshi óziniń aman-esen ekenin aityp, aldaǵy ýaqytta da shyǵarmashylyǵyn jalǵastyratynyn jetkizdi. Sondai-aq jaryqqa shyqpaǵan jańa ánderi bar ekenin aityp, tyńdarmandaryna aldaǵy josparynan habar berdi.
Oqiǵa neden bastaldy?
Buǵan deiin Erdos Qanaev áleýmettik jelide Baǵlan esimdi dosynyń ómirden ozǵanyn aityp, oǵan qatysty esteligimen bólisken.
Alaida marqumnyń esimi tanymal ánshi Baǵlan Ábdiraiymovtyń esimimen birdei bolǵandyqtan, áleýmettik jelide túsinbeýshilik týyndaǵan.
Osylaisha, basqa adamǵa qatysty qaraly habar ánshiniń qaitys bolǵany týraly jalǵan aqparattyń taralýyna sebep boldy. Baǵlan Ábdiraiymov bul jaǵdaiǵa ózi túsinikteme berip, qaýesetti joqqa shyǵardy.
Baǵlan Ábdiraiymov kim?
Baǵlan Ábdiraiymov – qazaqstandyq ánshi, tanymal "Jigitter" tobynyń múshesi. Ol qazaq estradasynda kóp jyldan beri óner kórsetip kele jatqan oryndaýshylardyń biri. Ánshi kópshilikke "Jigitter" tobynyń quramynda tanyldy. Ujymnyń repertýarynda mahabbat, dostyq, otbasy jáne adamgershilik taqyryptaryna arnalǵan ánder bar. Toptyń ózge múshelerimen birge Baǵlan Ábdiraiymov Qazaqstannyń túrli qalalarynda kontsert berip, tyńdarman yqylasyna bólendi.
Ómirbaiandyq málimetterge sáikes, Baǵlan Ábdiraiymov 1983 jyly qazirgi Túrkistan oblysynyń Túlkibas aýdanyndaǵy Aqsý-Jabaǵyly eldi mekeninde dúniege kelgen. Ol otbasyndaǵy tuńǵysh bala.
Ánshiniń jeke shyǵarmashylyǵynda "Baǵala" ániniń orny erekshe. Bul týyndynyń áýenin Ǵaliia Shaýdyrbaeva, sózin Serik Seiitman jazǵan.
Óner iesi ómirinde qumar oiynǵa táýeldi bolyp, úlken qarjylyq qiyndyqtarǵa tap bolǵanyn suhbattarynda ashyq aitqan. Keiin osy tájiribesi negizinde "Aq pen qara" atty kitap jazyp, qumar oiynnyń zardaby týraly film túsirdi.
Sondai-aq ol osy máselege tap bolǵan adamdarmen kezdesip, óz tájiribesimen bólisken.
2026 jyly "Kezdesý" baǵdarlamasyna bergen suhbatynda ánshi shyǵarmashylyǵy, otbasy, bala tárbiesi jáne ómirinen alǵan sabaqtary týraly áńgimeledi.
