Foto: elements.envato.com
Reseilik kompaniialardyń Qazaqstanǵa kóshýi jalǵasyp jatyr. Degenmen, sońǵy ýaqytta onyń qarqyny aitarlyqtai tómendedi, dep habarlaidy QazAqparat.
Finprom.kz portalynyń málimetinshe, sońǵy jyldary elimizde sheteldik kapitaldyń qatysýy bar jumys istep turǵan zańdy tulǵalardyń sany 24,3 paiyzǵa artyp, 54,4 myńǵa jetip otyr. Degenmen mundai kásiporyndardyń tórteýiniń úsheýi ǵana jumys istep tur. Tamyzda olardyń sany 41,4 myń kásiporyn bolǵan.
Elimizge kelip jatqan zańdy tulǵalardyń 78 paiyzy saýda, qyzmet, IT-klaster, ákimshileý jáne qosalqy qyzmet kórsetý sarapshylary syndy salalardy qamtidy. Ekonomikanyń basqa da sektorlarynda ósim baiqalǵanymen, mardymsyz.
Qazaqstandaǵy árbir ekinshi sheteldik kásiporyn - reseilik. 1 jyl buryn olardyń sany 11,9 myń bolsa, biyl 18,6 myńǵa jetip otyr. Elimizde jumys istep turǵan sheteldik kásiporyndar qataryndaǵy reseilik kompaniialardyń úlesi 44,9 paiyzdy quraidy. Odan keiingi orynda túrik biznesmenderi tur. Tamyz aiynyń sońynda elimizde túriktiń 3,7 myń zańdy tulǵasy boldy. Al úshinshi orynda turǵan Ózbekstannyń 2,7 myń kompaniiasy tirkelgen.
Soltústik kórshimizdegi saiasi jáne ekonomikalyq oqiǵalar aiasynda reseilik kompaniialardyń Qazaqstanǵa kóshýi jiiledi. 2022 jyldyń basynda elimizde 8 myń ǵana reseilik zańdy tulǵa tirkelgen bolatyn. Dál qazirgi ýaqytta kórsetkish birden 2,3 ese ósip otyr.
Osy jyldyń basynda da reseilik biznes-rezidentterdiń Qazaqstanǵa kóshýi jalǵasty. Degenmen ótken jylǵa qaraǵanda qarqyny tómen, ai saiynǵy ósimi 3-5 paiyzdy quraidy. Jazda tipti tómendep, aiyna 0,8 paiyzdan 1,3 paiyzǵa deiin ǵana tirkeldi.
