Mihail Fridman.
Reseilik kásipker Mihail Fridman Ýkrainanyń densaýlyq saqtaý, azyq-túlik jáne energetika qaýipsizdigimen bailanysty infraqurylymyn qarjylandyrýǵa jeke esepshotynan bir milliard dollar qarajat usyndy. Ol qarjyny ýkrainalyq "Alfa bankke" aýdarý qajettigin aitty. Amerikalyq Wall Street Journal basylymynyń jazýynsha, kásipker osylaisha Ulybritaniianyń sanktsiiasynan qutylǵysy keledi, dep habarlaidy Azattyq.
Mihail Fridman – ýkrainalyq "Alfa-Bank" ieleriniń biri. Biraq bul qarjy uiymynyń reseilik "Alfa-bankke" qatysy joq.
Bank ókilderi osyndai usynys jasalǵanyn rastap, ýkrainalyq Ortalyq bankke jiberilgenin aitty. Bank ókilderiniń sózine qaraǵanda, usynys mańyzdy, sebebi qarajat soǵystan keiin eldi qalpyna keltirýge jumsalmaq.
Fridmannyń ózi WSJ bergen túsiniktemesinde eshqandai shart qoimaǵanyn, sanktsiiany alý týraly usynys ta aitpaǵanyn jetkizdi. Al Ulybritaniia SIM London sanktsiiadan jaltarý áreketterin qoldamaidy dedi.
Ulybritaniiadan bólek Eýroodaq ta Fridmanǵa sanktsiia salǵan.
Kásipker Reseidiń Ýkrainaǵa basqynshylyǵyna bailanysty sanktsiiaǵa ilingen. Britan biliginiń tujyrymdaýynsha, Fridman men biznes áriptesi Petr Aven iri kásipkerler retinde prezident Vladimir Pýtinge yqpaly etedi. Fridman muny joqqa shyǵarady. Naýryzda sanktsiiaǵa ilingennen keiin Ulybritaniiada turatyn kásipker qiyndyqqa ushyraǵanyn, tipti tazalaýshynyń aqysyn bere almai otyrǵanyn aitqan.
Forbes Fridmannyń bailyǵyn 11,8 milliard dollarǵa baǵalaidy.
