Qyrym jaqtan Herson oblysyna kirip kele jatqan reseilik áskeriler. 24 aqpan 2022 jyl.
Resei áskerileri Ýkrainanyń Herson oblysynyń ákimshilik ǵimaratyn aldy. Bul týraly Herson oblystyq ákimshiliginiń tóraǵasy Gennadii Lagýta málimdedi, dep habarlaidy Azattyq.
Biraq Lagýta oblys ákimshiligi mindetterin oryndaýdy aryqarai jalǵastyra beretinin aitty.
"Men basqaryp otyrǵan oblystyq jedel shtab oblys turǵyndarynyń máselesin sheshý úshin jumysyn jalǵastyryp jatyr. Gýmanitarlyq kómekti kútip otyrmyz" dep jazdy ol telegramm-kanalynda.
Lagýta jergilikti turǵyndardy "alańdamaýǵa shaqyrdy".
"Jedel shtabtyń reglamentine sai jumys jalǵasyp jatyr" dedi ol.
24 aqpanda Resei prezidenti Pýtin el áskerin Ýkrainaǵa kirgizgen. Sodan beri Ýkrainada soǵys jalǵasyp jatyr. Kreml turǵyn úilerge shabýyl jasap jatqan joqpyz dese de, Ýkrainada kóptegen turǵyn úiler, mektepter, áskeri emes ǵimarattar qiraǵan. Eki jaqtan da adam shyǵyny bar.
Ýkraina taraby reseilik 9 myń áskeri qaza bolǵanyn aitady.
Keshe, 2 naýryzda Resei qorǵanys biligi Ýkrainadaǵy soǵysta 500-dei áskerinen aiyrylǵanyn, 1957 áskeriiniń jaralanǵanyn aitqan. Máskeý Ýkraina tarapynan 2870-ten asa áskeri qaza bolyp, 3700-ten asa adam jaralandy, 572 adam kepilge alyndy degen.
Soǵys jaǵdaiynda mundai aqparattardy tekserý múmkin emes.
