Reseidiń Syrtqy barlaý qyzmeti (SVR) Ýkraina Qarýly kúshteri Resei aýmaǵyna jańa drondyq shabýyldar jasaýǵa daiyndalyp jatqanyn málimdedi, dep habarlaidy Ult.kz.
SVR baspasóz biýrosynyń habarlaýynsha, Kiev biligi Eýropadaǵy saiasi jáne qarjylyq seriktesterine Ýkraina armiiasynyń áli de soǵys áleýetin saqtap otyrǵanyn jáne Resei ekonomikasyna soqqy bere alatynyn kórsetýge tyrysyp otyr.
Reseilik barlaý málimetinshe, Ýkraina tek Baltyq elderi arqyly áýe dálizderin paidalanýmen shektelmei, ushqyshsyz apparattardy osy memleketterdiń aýmaǵynan ushyrýdy josparlap otyr. Málimdemede mundai taktika nysanaǵa jetý ýaqytyn qysqartyp, shabýyldardyń tiimdiligin arttyrady delingen.
SVR Latviia biligi bastapqyda Máskeýdiń yqtimal jaýap soqqysynan qaýiptengenin, alaida Kievtiń qysymynan keiin operatsiiaǵa kelisim bergenin atap ótti. Resei tarapy ýkrainalyq tarap naqty ushyrý núktesin anyqtaý múmkin emes ekenin alǵa tartqanyn málimdedi.
Sonymen qatar, Resei barlaýy Ýkraina Qarýly kúshteriniń ushqyshsyz júieler bóliminiń áskeri qyzmetkerleri Latviia aýmaǵyndaǵy «Adaji», «Seliia», «Lielvarde», «Daýgavpils» jáne «Ekabpils» áskeri bazalaryna ornalastyrylǵanyn habarlady.
SVR qazirgi zamanǵy barlaý quraldary drondardyń naqty qai jerden ushyrylǵanyn anyqtaýǵa múmkindik beretinin aityp, qajet bolǵan jaǵdaida sheshim qabyldaý ortalyqtarynyń koordinattary belgili ekenin eskertti.
Sondai-aq Resei Syrtqy barlaý qyzmeti NATO músheligi «terroristerge kómekteskenderdi» jaýapkershilikten qorǵamaitynyn málimdedi.
