Qazaqstan quramasynyń bas bapkeri Mihal Bilek qazan aiynda ótetin oiyndarǵa shaqyrylǵan fýtbolshylardyń esimin jariialady, dep habarlaidy QazAqparat.
Qazaqstan fýtbol federatsiiasynan málim etkenindei, tizimge 23 fýtbolshy endi.
Shaqyrylǵandar qatarynda Reseidiń «Rostov» komandasynyń namysyn qorǵap júrgen jartylai qorǵaýshy Baktier Zainýtdinov bar. Jaraqatyna bailanysty biraz ýaqyt boiy emdelgen ol, alańǵa Máskeýdiń «Dinamosymen» bolǵan oiynnyń 81-minýtynda shyǵyp, ile-shala premer-ligadaǵy alǵashqy golyn soqqan edi. Matchtan keiin «Rostovtyń» bas bapkeri Valerii Karpin B.Zainýtdinovqa aldaǵy ýaqytta da senim artatynyn málimdegen bolatyn.
Sol sekildi ótken týrda «Qaisarmen» oiynda qos birdei goldyń avtory atanǵan «Astananyń» shabýylshysy Sergei Hijnichenko el quramasyna qaita oraldy.
Sonymen aldaǵy báselekelerge myna fýtbolshylar shaqyrtý alyp otyr.
Qaqpashylar: Dmitrii Nepogodov («Ordabasy»), Stas Pokatilov («Qairat»), Igor Shatskii («Shahter»);
Qorǵaýshylar: Abzal Beisebekov, Iýrii Logvinenko, Dmitrii Shomko (barlyǵy - «Astana»), Nuraly Álip, Ǵafýrjan Súiimbaev (ekeýi de - «Qairat»), Aleksandr Marochkin («Qaisar»), Temirlan Erlanov, Sergei Malyi (ekeýi de - «Ordabasy»), Oljas Kerimjanov («Jetisý»), Ian Vorogovskii («Beershot», Belgiia);
Jartylai qorǵaýshylar: Iýrii Pertsýh («Astana»), Aibol Ábiken, Georgii Jýkov, Baýyrjan Islamhan, Islambek Qýat (barlyǵy – «Qairat»), Ashat Taǵybergen («Qaisar»), Baktier Zainýtdinov («Rostov», Resei);
Shabýylshylar: Maksim Fedin («Tobyl»), Toqtar Jańǵylyshbai («Ordabasy»), Sergei Hijnichenko («Astana»).
Rezerv: Vladimir Plotnikov («Qairat»), Aslanbek Kákimov («Aqtóbe»), Serikjan Mýjikov, Roman Mýrtazaev (ekeýi de - «Astana»), Aslan Darabaev, Erkin Tapalov, Aibar Jaqsylyqov (barlyǵy - «Jetisý»), Dýman Nárzildaev («Qaisar»), Marat Bystrov, Timýr Dosmaǵambetov (ekeýi de – «Ordabasy»), Viktor Dmitrenko, Azat Nurǵaliev, Baýyrjan Turysbek, Rýslan Valiýllin, Dmitrii Miroshnichenko (barlyǵy - «Tobyl»), Gevorg Nadjarian («Shahter»).
Aita keteiik, Qazaqstan ulttyq quramasy «Astana Arena» stadionynda aldymen 10 qazan kúni Kipr quramasymen kezdesedi. Oiynnyń bastalýy – 20.00. Al 13 qazan kúni 19.00-de Belgiia quramasyn qabyldaidy.
Qazaqstan quramasy 2020 jylǵy Eýropa chempionatyna irikteý týrnirinde I tobynda 7 upaimen ázirge úshinshi orynda keledi. Bul topta kósh bastaǵan Belgiianyń 18, odan keiin Reseidiń 15 upaiy bar. Kipr de Qazaqstan sekildi 7 upaiǵa ie bolsa, besinshi oryndaǵy Shotlandiianyń qorjynynda 6 upai bar. Sondyqtan úshinshi oryn básekede Kiprmen ótetin match asa mańyzdy bolmaq.
