Resei politsiiasy túrmede ashtyq ustap jatqan oppozitsiialyq saiasatker Aleksei Navalnyi bostandyǵyn talap etken aktsiia kezinde 1700-den astam adamdy ustady, dep habarlaidy Azattyq.
Prezident Vladimir Pýtin federaldyq keńeske joldaý jasaǵan kúni Qiyr Shyǵysta Vladivostoktan bastap, Baltyq jaǵalaýyndaǵy Kaliningradqa deiingi aralyqta túrli qalalarda myńdaǵan adam Aleksei Navalnyi negizin qalaǵan "Jemqorlyqpen kúres qorynyń" jetekshileri shaqyrǵan mitingige qosyldy. Navalnyi jaqtastary Kreml synshysyna qajetti dárejede meditsinalyq kómek kórsetilmese, densaýlyǵy múlde nasharlap ketýi múmkin dep alańdaidy.
Narazylar men belsendilerdiń ustalýyn baqylaityn "OVD-Info" saitynyń habarlaýynsha, 21 sáýir túnge deiin Resei qalalarynda 1700-den astam adam ustalǵan. Jartysyna jýyǵy Sankt-Peterbýrg úlesine tiedi.
Birneshe kún buryn bilik "Jemqorlyqpen kúres qoryn" "ekstremistik uiym" dep atap, ony jabýǵa áreket qylǵan. Navalnyi kómekshileri narazylyqty sál keshirek ótkizýdi josparlaǵan, biraq saiasatkerdiń densaýlyǵynyń kúrt nasharlaýyna bailanysty narazylyqty sál erterek ótkizip otyr.
Navalnyi buǵan deiin beli men aiaǵyn emdetý úshin dáriger kirgizýdi talap etip, ashtyq jariialaǵan.
"Biz Navalnyi myrzanyń ómirine qaýip tónip tur dep sanaimyz" dep jazdy BUU-nyń adam quqyǵy boiynsha táýelsiz tórt sarapshysy 21 sáýirde jariialaǵan málimdemesinde.
Sársenbi kúni narazylyq ótpei turyp politsiia belsendilerdiń úiin tintip, jappai ustaý sharalaryn ótkizgen. Bas prokýratýra turǵyndarǵa "ruqsat etilmegen mitingige shyqpaý qajettigin" eskertip, shyqqan jaǵdaida jappai tártipsizdik baby boiynsha is qozǵalatynyn málimdegen.
("Nastoiashee vremia" arnasynyń videosy. 21 sáýir 2021 jyl).
