رەسەي پوليتسيياسى تٷرمەدە اشتىق ۇستاپ جاتقان وپپوزيتسييالىق ساياساتكەر الەكسەي ناۆالنىي بوستاندىعىن تالاپ ەتكەن اكتسييا كەزٸندە 1700-دەن استام ادامدى ۇستادى, دەپ حابارلايدى ازاتتىق.
پرەزيدەنت ۆلاديمير پۋتين فەدەرالدىق كەڭەسكە جولداۋ جاساعان كٷنٸ قيىر شىعىستا ۆلاديۆوستوكتان باستاپ, بالتىق جاعالاۋىنداعى كالينينگرادقا دەيٸنگٸ ارالىقتا تٷرلٸ قالالاردا مىڭداعان ادام الەكسەي ناۆالنىي نەگٸزٸن قالاعان "جەمقورلىقپەن كٷرەس قورىنىڭ" جەتەكشٸلەرٸ شاقىرعان ميتينگٸگە قوسىلدى. ناۆالنىي جاقتاستارى كرەمل سىنشىسىنا قاجەتتٸ دەرەجەدە مەديتسينالىق كٶمەك كٶرسەتٸلمەسە, دەنساۋلىعى مٷلدە ناشارلاپ كەتۋٸ مٷمكٸن دەپ الاڭدايدى.
نارازىلار مەن بەلسەندٸلەردٸڭ ۇستالۋىن باقىلايتىن "وۆد-ينفو" سايتىنىڭ حابارلاۋىنشا, 21 سەۋٸر تٷنگە دەيٸن رەسەي قالالارىندا 1700-دەن استام ادام ۇستالعان. جارتىسىنا جۋىعى سانكت-پەتەربۋرگ ٷلەسٸنە تيەدٸ.
بٸرنەشە كٷن بۇرىن بيلٸك "جەمقورلىقپەن كٷرەس قورىن" "ەكسترەميستٸك ۇيىم" دەپ اتاپ, ونى جابۋعا ەرەكەت قىلعان. ناۆالنىي كٶمەكشٸلەرٸ نارازىلىقتى سەل كەشٸرەك ٶتكٸزۋدٸ جوسپارلاعان, بٸراق ساياساتكەردٸڭ دەنساۋلىعىنىڭ كٷرت ناشارلاۋىنا بايلانىستى نارازىلىقتى سەل ەرتەرەك ٶتكٸزٸپ وتىر.
ناۆالنىي بۇعان دەيٸن بەلٸ مەن اياعىن ەمدەتۋ ٷشٸن دەرٸگەر كٸرگٸزۋدٸ تالاپ ەتٸپ, اشتىق جارييالاعان.
"بٸز ناۆالنىي مىرزانىڭ ٶمٸرٸنە قاۋٸپ تٶنٸپ تۇر دەپ سانايمىز" دەپ جازدى بۇۇ-نىڭ ادام قۇقىعى بويىنشا تەۋەلسٸز تٶرت ساراپشىسى 21 سەۋٸردە جارييالاعان مەلٸمدەمەسٸندە.
سەرسەنبٸ كٷنٸ نارازىلىق ٶتپەي تۇرىپ پوليتسييا بەلسەندٸلەردٸڭ ٷيٸن تٸنتٸپ, جاپپاي ۇستاۋ شارالارىن ٶتكٸزگەن. باس پروكۋراتۋرا تۇرعىندارعا "رۇقسات ەتٸلمەگەن ميتينگٸگە شىقپاۋ قاجەتتٸگٸن" ەسكەرتٸپ, شىققان جاعدايدا جاپپاي تەرتٸپسٸزدٸك بابى بويىنشا ٸس قوزعالاتىنىن مەلٸمدەگەن.
("ناستوياششەە ۆرەميا" ارناسىنىڭ ۆيدەوسى. 21 سەۋٸر 2021 جىل).
