21 sáýirde Resei qalalarynda politsiia belsendiler men jýrnalisterdi tintip, jappai ustai bastady. Sársenbi kúni eldiń kóp qalasynda oppozitsiialyq saiasatker Aleksei Navalnyidy qoldaý aktsiiasy ótedi dep habarlanǵan.
Azattyqtyń Orys qyzmetiniń habarlaýynsha, Máskeýde oppozitsioner Liýbov Soboldi politsiia metro stantsiiasy mańynan ustaǵan. Bul týraly Twitter-de onyń advokaty Vladimir Voronin habarlady. Onyń sózine qaraǵanda, politseiler Soboldi takside otyrǵan jerinen ustap áketken.
Máskeýde sonymen birge Aleksei Navalnyidyń baspasóz hatshysy Kira Iarmysh ta ustalǵan. Advokaty Veronika Poliakovanyń sózinshe, Iarmysh tergeýshiler shyǵýǵa ruqsat etken ýaqytta – 10 men 11 aralyǵynda dúkenge shyqqan kezde ustalǵan.
Sobol men Iarmysh qańtar aiyndaǵy Aleksei Navalnyidy qoldaý aktsiiasyna qatysty qozǵalǵan iste aiyptalýshy retinde tanylǵan. Olarǵa sanitarlyq-epidemiologiialyq erejelerdi buzdy degen aiyp taǵylyp otyr.
Sankt-Peterbýrge politsiia keminde alty belsendiniń úiine tintý júrgizgen. Aqparatqa qaraǵanda, tintý qańtar aiyndaǵy Navalnyidy qoldaý aktsiiasy kezindegi joldyń jabylýyna qatysty ispen bailanysty. Belsendilerdiń protsessýaldyq statýsy ázirge belgisiz.
Buǵan qosa, Nijnii Novgorod, Rostovtaǵy-Don, Irkýtsk jáne ózge qalalarda politsiianyń belsendilerdi ustap jatqany týraly aqparat sát saiyn túsip jatyr. Krasnoiarsk turǵyny Aleksandr Pismandy 20 sáýirde keshke politsiia ustap áketken. "OVD-Info" saitynyń jazýynsha, sodan beri belsendiden habar joq. Pisman Feisbýkta "Politsiiaǵa apara jatyr. Ekstremistik birdeńe deidi..." dep jartysy aiaqtalmaǵan post jazyp úlgergen. 18 sáýirde ol paraqshasynda Aleksei Navalnyidy qoldaý aktsiiasy jaily habarlandyrý ilgen.
Máskeýde politsiia SOTA basylymynyń tilshisi Sergei Kýokýge mitingige qatyspaý jaily eskertý jasaǵan.
- Navalnyidyń jaqtastary 31 naýryzdan beri túrmede ashtyq jariialap jatqan Aleksei Navalnyidy qoldaý aktsiiasyn ótkizetinin habarlaǵan. Navalnyi ózine táýelsiz dárigerdi jiberýin talap etip otyr. Osyǵan deiin dárigerler onyń jaǵdaiynyń jyldam nasharlap bara jatqanyn habarlaǵan.
- Resei bas prokýratýrasy men ishki ister ministrligi azamattarǵa ruqsat etilmegen mitingige qatyspaý qajettigin eskertip, Qylmystyq kodekstegi jappai tártipsizdik boiynsha is qozǵalýy múmkin ekenin aitqan.
