Qazaqstannyń Sankt Peterbýrgtegi Bas konsýldyǵy Pskov oblysy Nevel qalasyndaǵy Keńes Odaǵynyń Batyry Mánshúk Mámetovanyń eskertkishin qorlaý deregi boiynsha RF IIM Basqarmasynan jaýap aldy, - dep habarlaidy kaz.tengrinews.kz tilshisi konsýldyqtyń ókilderine silteme jasap.
Quqyq qorǵaý organdary videonyń eki jyl buryn túsirilgenin anyqtaǵan. Vandaldyń aty-jóni de anyqtalǵan. Ol Nevel aýdanynyń Leonovo aýylynyń týmasy - 1997 jylǵy Sergei Repov eken.
Bergen túsiniktemesinde ol Mámetovanyń eskertkishiniń mańynan ótip bara jatyp, "sátti kadr" jasaǵysy kelgenin jazǵan. Dosy Ilia Kýbanovtan sýretke túsirýin suraǵan, al ol óz kezeginde rolikte "VKontakte" jelisine júktepti.
Bul derek politsiianyń jergilikti bóliminde tirkelgen.
Eske salaiyq, osyǵan deiin Internette taralǵan videoda bir er adamnyń eskertkishke shyǵyp alyp, sýretke túskeni kórinedi. Rolikte bylapyt sózder aitylǵan.
