Máskeý soty "ekstremizmge shaqyrdy" dep aiyptalǵan tanymal bloger Egor Jýkovtyń bas bostandyǵyn úsh jylǵa shektedi. Sot úkimin oqyǵan sýdia onyń "internet arqyly ekstremistik áreket jasaýǵa shaqyrǵany anyqtaldy" dedi. Resei qoǵamynda onyń isiniń "saiasi astary bar" ekeni aitylady.
Sot úkimi 6 jeltoqsanda Kýntsev aýdandyq sotynda oqyldy. Máskeýdegi Joǵary ekonomika mektebiniń stýdenti Egor Jýkovty qoldaý úshin sotqa júzdegen adam keldi.
Jýkov tamyz aiynda Máskeýde narazylyq jalǵasyp jatqan kezde qamalǵan. Jaz ailarynda Máskeý turǵyndary saiasi júieniń qýǵyndaý saiasatyna qarsy shyqqan.
- Bul naǵyz jeńis emes, árine. Barlyǵyńyzǵa kóp rahmet! - dedi Jýkov sot úkiminen keiin.
4 jeltoqsanda sońǵy sózin aitqan Jýkov "Reseidegi ahýal adamnyń órkendeýi úshin jasalǵan kez kelgen múmkindiktiń tamyryna balta shabady" dep málimdegen.
"Resei memleketi bir ǵana áleýmettik saiasatty júieli túrde júrgizip otyr - bul adamdardy bir-birinen ajyratý. Osylaisha memleket bizdi kóz aldymyzda adamdyq kelbetimizden aiyryp jatyr" dedi Jýkov sońǵy sózinde. Onyń "sońǵy sózi" internette jyldam tarady.
