Reseidiń áýe-ǵaryshtyq kúshteriniń An-26 ushaǵy Voronej oblysynda apatqa ushyrady, ekipaj tolyǵymen qaza tapty. Bul týraly jýrnalisterge Batys áskeri okrýginiń baspasóz qyzmeti málim etti, dep habarlaidy QazAqparat TASS agenttigine silteme jasap.
«24 aqpan kúni Voronej oblysynda áskeri múlikti tasymaldaý kezinde Reseidiń Áýe-ǵarysh kúshteriniń An-26 ushaǵy apatqa ushyrady. Ekipaj qaza tapty. Jerde esh ǵimaratqa zaqym kelmedi. Aldyn ala berilgen aqparat boiynsha, tehnika isten shyqqan», - dep habarlady baspasóz qyzmeti.
Okrýg aqparatyna sai, apat saldaryn joiý men onyń sebebin anyqtaý maqsatynda Áýe-ǵarysh kúshteriniń komissiiasy oqiǵa ornyna jóneltildi.
An-26 – keńestik, keiinirek Reseilik kóp maqsatty ushaq. Ol OKB-153 tájiribelik-konstrýktorlyq biýrosynda (keiin – O.K. Antonov atyndaǵy tájiribelik-konstrýktorlyq biýrosy) 1960 jyldary jasalǵan. Jańa nusqasynyń aldyńǵyǵa qaraǵanda júk salatyn liýgi úlken, ushý massasy aýyr, sonymen qatar illiýminatorlary bar.
Ushaq birinshi ret 1969 jyly 21 mamyrda ushyrylǵan. Ekipajdy synaýshy ushqysh Iýrii Ketov basqarǵan. 1975 jyly 26 mamyrda KSRO Áskeri-áýe kúshterine qabyldandy.
Ushaq 1969-1986 jyldary Kiev pen Ýlan-Ýde qalalaryndaǵy aviatsiialyq zaýyttarda óndirilip otyrǵan. Barlyǵy 1 398 ushaq qurastyrylyp, qazirgi kezde júzdegen ushaq qoldanysta. Ondaǵan jetildirilgen túrleri bar.
