رەسەيدٸڭ ەۋە-عارىشتىق كٷشتەرٸنٸڭ ان-26 ۇشاعى ۆورونەج وبلىسىندا اپاتقا ۇشىرادى, ەكيپاج تولىعىمەن قازا تاپتى. بۇل تۋرالى جۋرناليستەرگە باتىس ەسكەري وكرۋگٸنٸڭ باسپاسٶز قىزمەتٸ مەلٸم ەتتٸ, دەپ حابارلايدى قازاقپارات تاسس اگەنتتٸگٸنە سٸلتەمە جاساپ.
«24 اقپان كٷنٸ ۆورونەج وبلىسىندا ەسكەري مٷلٸكتٸ تاسىمالداۋ كەزٸندە رەسەيدٸڭ ەۋە-عارىش كٷشتەرٸنٸڭ ان-26 ۇشاعى اپاتقا ۇشىرادى. ەكيپاج قازا تاپتى. جەردە ەش عيماراتقا زاقىم كەلمەدٸ. الدىن الا بەرٸلگەن اقپارات بويىنشا, تەحنيكا ٸستەن شىققان», - دەپ حابارلادى باسپاسٶز قىزمەتٸ.
وكرۋگ اقپاراتىنا ساي, اپات سالدارىن جويۋ مەن ونىڭ سەبەبٸن انىقتاۋ ماقساتىندا ەۋە-عارىش كٷشتەرٸنٸڭ كوميسسيياسى وقيعا ورنىنا جٶنەلتٸلدٸ.
ان-26 – كەڭەستٸك, كەيٸنٸرەك رەسەيلٸك كٶپ ماقساتتى ۇشاق. ول وكب-153 تەجٸريبەلٸك-كونسترۋكتورلىق بيۋروسىندا (كەيٸن – و.ك. انتونوۆ اتىنداعى تەجٸريبەلٸك-كونسترۋكتورلىق بيۋروسى) 1960 جىلدارى جاسالعان. جاڭا نۇسقاسىنىڭ الدىڭعىعا قاراعاندا جٷك سالاتىن ليۋگٸ ٷلكەن, ۇشۋ ماسساسى اۋىر, سونىمەن قاتار يلليۋميناتورلارى بار.
ۇشاق بٸرٸنشٸ رەت 1969 جىلى 21 مامىردا ۇشىرىلعان. ەكيپاجدى سىناۋشى ۇشقىش يۋريي كەتوۆ باسقارعان. 1975 جىلى 26 مامىردا كسرو ەسكەري-ەۋە كٷشتەرٸنە قابىلداندى.
ۇشاق 1969-1986 جىلدارى كيەۆ پەن ۋلان-ۋدە قالالارىنداعى اۆياتسييالىق زاۋىتتاردا ٶندٸرٸلٸپ وتىرعان. بارلىعى 1 398 ۇشاق قۇراستىرىلىپ, قازٸرگٸ كەزدە جٷزدەگەن ۇشاق قولدانىستا. ونداعان جەتٸلدٸرٸلگەن تٷرلەرٸ بار.
