Ýkraina biligi Resei áskeri Harkov pen Zaporojedegi infraqurylymdardy zymyranmen atqylaǵanyn habarlady. Jaralanǵandar bar, dep jazady Azattyq.
Harkov meri Igor Terehov 21 qazanda tańerteń qalaǵa shabýyl jasalǵanyn málimdedi.
"Harkovte jarylystar boldy. Óte saq bolyńyzdar" dep jazdy ol Telegram-arnasynda.
Onyń aitýynsha, Harkovtegi kásiporyndardyń birine zymyran túsken. Kásiporyn aýmaǵyndaǵy ákimshilik-óndiris ǵimaraty qiraǵan.
Harkov oblysynyń basshysy Oleg Sinegýbov orys armiiasynyń soqqysynan keiin bes adamnyń jaralanǵanyn aitty. Buǵan qosa, ónerkásip infraqurylymdary da búlingen. Keiin ol jaralanǵandar sany alty adam bolǵanyn jetkizdi.
Resei qorǵanys ministrligi Harkovke soqqy jóninde habarlamady, alaida eki aptadan beri Ýkrainanyń energetika nysandaryn zymyranmen atqylap jatqanyn rastap keledi.
Resei áskeriniń shabýyly jalǵasyp jatqan tusta Zaporoje oblysy ákimshiliginiń jetekshisi Aleksandr Starýh halyqty bombadan qorǵaityn oryndarda qalýǵa shaqyrdy.
Keiin ol shabýyldyń nátijesinde qalada zymyran synyqtary qalýy múmkin ekenin eskertip, bólshekterge jolamaýǵa úndedi.
"Qarsylas jaqtyń soqqysynan aldyn ala málimet boiynsha turǵyn úiler men qala infraqurylymy qirady. Qiraǵan nysandar men zardap shekkender jaidy aqparat anyqtalyp jatyr" dedi shabýyldardyń jai-japsaryna toqtalǵan Zaporoje qalalyq keńesiniń hatshysy Anatolii Kýrtev.
