Resei Federatsiiasynyń Úkimeti tolyq quramda otstavkaǵa ketedi. Bul týraly Ministrler kabinetiniń basshysy Dmitrii Medvedev málimdedi, dep habarlaidy "Ult aqparat".
Medvedevtiń sózinshe, Vladimir Pýtinniń 15 qańtarda halyqqa joldaýynda aitylǵan Konstitýtsiiaǵa ózgerister engizý týraly usynysynan keiin Úkimet taratý sheshimi qabyldanǵan.
«Atap ótilgendei, talqylaýdan keiin atalmysh ózgerister qabyldanǵan jaǵdaida, olar Konstitýtsiianyń birqatar baptaryna ǵana emes, sondai-aq tutastai biliktiń, atqarýshy biliktiń, zańnamalyq biliktiń, sot biliginiń balansyna aitarlyqtai ózgerister engizedi. Bul kontekstte Resei Federatsiiasynyń Úkimeti retinde el Prezidentine barlyq qajetti sharalardy qabyldaýǵa múmkindik berýimiz qajet ekeni túsinikti. Osy jaǵdaida RF Konstitýtsiiasynyń 117-babyna sáikes Resei Federatsiiasynyń Úkimeti búgingi quramynda otstavkaǵa ketkeni durys dep sanaimyn», - dedi Medvedev.
Pýtin 15 qańtardaǵy joldaýynda Konstitýtsiiaǵa ózgeris engizip, Prezident ókilettiliginiń jartysyn Memlekettik dýmaǵa berýdi jáne eki azamattyǵy bar ne shetelde turaqty turýǵa ruqsaty bar adamnyń Prezidenttik sailaýǵa túsýine tyiym salýdy usynǵan edi. Budan bólek, ol Konstitýtsiianyń "bir adam eki ret qatarynan Prezident bolyp sailana almaidy" degen tusyndaǵy "qatarynan" degen sózdi alyp tastaýdy da usyndy.
Interfakstiń habarlaýynsha, Resei Prezidenti Medvedev úkimetine jańa kabinet jasaqtalǵansha qyzmetin jalǵastyra berýdi tapsyrǵan. Sondai-aq, Pýtin Medvedevke Resei qaýipsizdik keńesi tóraǵasynyń orynbasary qyzmetin usyndy.
Aita keteiik, Medvedev Resei Úkimetin 2012 jyldan beri basqaryp keledi. 2008-2012 jyldary Resei Prezidenti bolǵan. Ol 2012 jyldan beri "Edinaia Rossiia" partiiasyn da basqarady.
