Resei soldattarynyń denesi. Ýkraina, Harkov mańy, 6 mamyr 2022 jyl
Resei áskeri Ýkrainaǵa basyp kirgen alǵashqy 3 aida Sovet ókimetiniń Aýǵanstanda 10 jyl soǵysqandaǵy shyǵynyna para-par shyǵyn kórgen bolýy múmkin. Bul aqparatty 23 mamyrda Britaniia barlaýy jariialady.
Ýkrainadaǵy soǵys týraly kezekti aqparatynda britan barlaýy Resei áskeriniń kóp shyǵynǵa ushyraǵanyn jekelegen bólimsheleriniń taktikalyq daiyndyǵynyń nasharlyǵymen, komandalyq basqarýdyń ikemsizdigi jáne áýeden qoldaýdyń jetkiliksizdigimen bailanystyrdy.
Mamyr aiynyń ortasynda Britaniia barlaýy Resei aqpanda Ýkrainaǵa basyp kirý úshin jinaǵan qurlyqtaǵy áskeriniń úshten birinen aiyrylǵanyn jariialady. Ol kezde shamamen 150 myń jaýynger bolǵan. Alaida onyń qanshasy ólgeni belgisiz.
"Mediazona" esebinshe, Ýkrainada ólgen Reseidiń 2500 jaýyngeriniń aty-jóni ashyq derekterde bar. Resei Qorǵanys ministri ólgender sanyn alǵash ret naýryz aiynda eki ese azaityp habarlaǵan. Ýkrainanyń esebinshe, Resei áskeriniń shyǵyny 30 myńǵa jýyqtaǵan. Ýkraina óz shyǵyny jaily habarlaǵan joq. Eki tarap ta óz shyǵynyn azaityp, qarsylas shyǵynyn ulǵaityp kórsetýge tyrysady. Bul málimetterdi soǵys jaǵdaiynda tekserý múmkin emes.
Sovet áskeri Aýǵanstandaǵy negizinen aýǵan kóterilisshileriniń shashyrańqy toptarymen soǵysqan bolatyn. Bul joly Resei áskerine Ýkrainanyń 261 myńdyq áskeri, 100 myńǵa jýyq jergilikti qorǵanys bólimderi jáne ózge de kúsh qurylymdarynyń bólimsheleri qarsy tur.
