Reseiden asa iri mólsherde alaiaqtyq jasady degen kúdikke ilingen Qazaqstan azamaty elge jetkizildi. Oǵan ken óndirý jáne jol qurylysyna qatysty kelisimsharttar jasasýǵa kómektesemin dep, azamattardan qomaqty qarajat aldy degen aiyp taǵylyp otyr, dep habarlaidy ult.kz.
Bas prokýratýranyń málimetinshe, tergeý barysynda kúdiktiniń 2019 jyldyń aqpanynda Aqmola oblysyndaǵy ken ornynda quramynda altyn bar kendi óndirýge arnalǵan kelisimshart jasasýǵa járdemdesemin degen syltaýmen úsh azamattan 500 myń AQSh dollaryn iemdengeni anyqtalǵan.
Kúdikti munymen toqtamaǵan. 2021 jyly ol eki kásipkerdi «QazAvtoJol» UK» AQ-men jol-qurylys jumystaryna qatysty kelisimshart jasaýǵa kómektesetinine sendirip, olardan 93,4 mln teńge alǵan.
Qylmystan keiin kúdikti Qazaqstannan jasyrynǵan. Osyǵan bailanysty oǵan halyqaralyq izdeý jariialanǵan.
Bas prokýratýranyń habarlaýynsha, kúdikti ótken jyldyń qyrkúieginde Reseidiń Máskeý qalasynda ustalǵan. Qazaqstan tarapynyń suraýy negizinde ol elge ekstraditsiialandy.
Qazir kúdikti tergeý izoliatoryna qamalǵan. Onyń kinási sotta dáleldengen joq.
Bul qylmys boiynsha múlikti tárkileý, sondai-aq belgili bir laýazymdardy atqarý nemese belgili bir qyzmetpen ainalysý quqyǵynan aiyra otyryp ne onsyz 5 jyldan 10 jylǵa deiin bas bostandyǵynan aiyrý jazasy qarastyrylǵan.
