Jyl saiyn JOO rektorlary qarjylyq-sharýashylyq qyzmet pen ǵylymi-zertteý, oqytý jumystary jóninde halyq aldynda esep beredi, dep habarlaidy QazAqparat.
Bul týraly QR Bilim jáne ǵylym vitse-ministri Miras Dáýlenov Ortalyq kommýnikatsiialar qyzmetindegi brifingte eske saldy.
«JOO-lardy tórt sanat boiynsha saralaý mańyzdy baǵyt bolyp otyr. Bul – halyqaralyq tájiribe. Bul joǵary oqý oryndarynyń qandai deńgeide ekenin túsinýge qajet. JOO-lardy saralaý negizinde túlekterdi jumysqa ornalastyrý deńgeii, eldiń, óńirdiń, qandai da bir salanyń damýyna qosqan úlesi bolady, osylaisha akademiialyq derbestik birte-birte keńeiedi», - dep túsindirdi vitse-ministr.
Onyń aitýynsha, ekinshi mańyzdy nárse – JOO-lardyń basqarý derbestigin qamtamasyz etý. Bul baǵyttaǵy jumys túbegeili qaita quryldy. Endi JOO-lar alqalyq basqarý organdaryn, formalaryn aiqyndai alady jáne zańdy turǵyda olardyń naqty túrlerin, basqarý organdaryn aiqyndaý shektelmeidi.
«Sondai-aq, joǵary bilim sapasyna qoiylatyn talaptardy arttyramyz. Iaǵni, bizdiń tarapymyzdan joǵary bilim berý júiesi memlekettik standarttar, JOO qyzmetiniń úlgilik erejeleri arqyly retteledi. Osyǵan bailanysty biz jyl saiyn JOO rektorlary oqý ornynyń qarjylyq-sharýashylyq qyzmeti, ǵylymi-zertteý jáne oqý jumystary boiynsha jurtshylyq aldynda esep beretinin kózdep otyrmyz. Bul «halyq únine qulaq asatyn memleket» tujyrymdamasyndaǵy óte mańyzdy sát. Taǵy bir aita keterligi – sheteldik joǵary oqý oryndaryndaǵy bilim alýshylar memlekettik tapsyrys berilgen nemese halyqaralyq akkreditatsiiasy bar joǵary oqý oryndaryna aýystyrylady. Bul da bilim sapasyn arttyrýǵa baǵyttalǵan», - dedi M. Dáýlenov.
