QR Mádeniet jáne sport ministri Aqtoty Raiymqulova IýNESKO-nyń atqarýshy direktory Odre Azýleniń shaqyrýymen Mádeniet ministrleriniń forýmyna qatysty. Parijdegi uiymnyń shtab-páterinde ótip jatqan is-sharaǵa 150 memlekettiń ministri jinaldy, dep habarlaidy "Ult aqparat".
«Qoǵamdyq mádeniet áleýmettik jáne qala ózgerisiniń qozǵaýshy kúshi» atty sessiiaǵa qatysqan ministr elimizdegi mádeniet salasynyń mańyzdy baǵyttary men Elbasy Nursultan Nazarbaevtyń «Rýhani jańǵyrý» baǵdarlamalyq maqalasy jáne Prezident Qasym-Jomart Toqaevtyń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» Joldaýy aiasynda atalǵan sala boiynsha atqarylyp jatqan jumystarmen tanystyrdy», - dep atap ótti Mádeniet ministrliginiń baspasóz qyzmetinen.
Sonymen qatar, vedomstvo basshysy elimizde BUU-nyń tujyrymdamasyna sai týrizmdi damytý, rýhani qundylyqtardy nasihattaý jáne tarihi eskertkishterdi qorǵaý boiynsha júrgizilip jatqan júieli jumystar týraly aitty.
Sóz sońynda Aqtoty Raiymqulova IýNESKO-ǵa múshe elderdi uly Abaidyń 175 jyldyǵy men «Ekinshi ustaz» atanǵan ál-Farabidiń 1150 jyldyq mereitoiy qarsańynda ótetin mádeni, ǵylymi-tanymdyq is-sharalarǵa belsene qatysýǵa shaqyrdy.
Al IýNESKO atqarýshy direktory Odre Azýlemen kezdesý barysynda ministr Qazaqstan men uiym arasyndaǵy mádeniet jáne sport salasyndaǵy mańyzdy máseleler men áriptestik jaiyn talqylady. Kelissóz barysynda jaqynda ǵana Almatyda qurylatyny belgili bolǵan Halyqaralyq mádeni bailanystar ortalyǵynyń alǵashqy jobasy men Túrkistan qalasynyń damý josparymen bólisti. Ministr túrki áleminiń ortalyǵy sanalatyn Túrkistandy damytý jáne Qoja Ahmet Iasaýi kesenesin qorǵaý eń joǵary halyqaralyq talaptarǵa sai júrgiziletinin atap ótti.
Sondai-aq, Aqtoty Raiymqulova forým aiasynda ótkizilgen birneshe is-sharaǵa qatysty. Olardyń biri - «Indigo boiaýynyń izimen» atty halyqaralyq kórmede Aijan Bekqulova men Tamara Kápqyzynyń kiiz basý óneri keńinen tanystyryldy.
