Mádeniet jáne sport ministri Aqtoty Raiymqulova Ekologiia, geologiia jáne tabiǵi resýrstar ministri Maǵzum Myrzaǵaliev, «Kazakh Tourism» ulttyq kompaniiasy» AQ basqarma tóraǵasy Erjan Erkinbaevpen birge Mańǵystaý oblysyna jumys saparymen bardy.
Bul týraly QR Mádeniet jáne sport ministrliginiń baspasóz qyzmeti habarlady.
Olar Mańǵystaý oblysynyń ákimi Serikbai Turymovpen, ǵalymdarmen jáne jergilikti qoǵam ókilderimen kezdesip, Bozjyra shatqalyndaǵy týristik keshen qurylysynyń qazirgi jaǵdaiyn talqylady.
«Mańǵystaýda týrizmniń belsendi damyp kele jatqan baǵyttarynyń biri – jaǵajai týrizmimen qatar, ekologiialyq týrizm. Ekologiialyq týrizmniń negizi – adamdy tabiǵi ortaǵa beiimdeýge baǵyttalǵan. Tabiǵat aiasynda saiahattaýdyń maqsat-múddesi osy. Mundai saiahat barysynda týristerdiń basty nazary aimaqtyń tabiǵi ereksheligi men «jabaiy tabiǵat» aiasynda demalýda bolady», - deidi Aqtoty Raiymqulova.
Onyń aitýynsha, biyl shilde aiynda Rixos Water World qonaqúiiniń ashylýy týristerdiń kóptep kelýine jáne ishki týrizmniń damýyna ońdy áser etti.
«Bastapqy kezeńde týrister kópten kelgen jaǵdaida ne isteýge bolatynyn durystap rettep almasa, durys uiymdastyrylmaǵan týrizm saldarynan týristik tabiǵi aýmaqtar jaqyn jyldary adamdardyń keri áserine tap bolady. Týrizmdi basqarý – týristerdiń qajettiligin jáne týristik infraqurylym qurý arqyly biznestiń ekonomikalyq jaǵyn qamtamasyz etý ekenin umytpaý kerek. Sondai-aq, tabiǵattyń biologiialyq áralýandyǵy men mańyzdy ekologiialyq protsesterdi saqtap qalý kerek», - deidi ol.
Sondai-aq, ol tabiǵi aýmaqtardaǵy týrizmdi damytýǵa ne kedergi ekenin aitty.
«Álemdik tájiribe kórsetkendei, erekshe qorǵalatyn tabiǵi aýmaqtardaǵy týrizmdi damytýdaǵy eń negizgi másele – týristerdi qabyldaý men qyzmet kórsetetin mamandandyrylǵan ortalyqtardyń, qonaqúilerdi ornalastyrýdyń qazirgi zamanǵy yńǵailylyq deńgeiiniń, qyzmet kórsetý deńgeiiniń tómendigi, usynylatyn qyzmetterdiń sapasy men olardyń quny arasyndaǵy sáikessizdik, nysandardyń qurylysyna investitsiialardyń bolmaýy», - deidi Aqtoty Raiymqulova.
