Ramazan aiynda Quran hatym rásimderi qashyqtan oqylady. Bul týraly Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly aitty, dep habarlaidy "Ult aqparat".
«Qazaqstan musylmandary dini basqarmasy Ramazan aiynda aitylatyn ýaǵyz-nasihat, suraq-jaýap jumystaryn onlain rejimde júrgizýdi jalǵastyrady. Quran hatym jasaý rásimderi de qashyqtan oqylady. Biz Ramazanda bir ai boiy jalǵasatyn dini dáristerdiń, qasietti Qadir keshiniń, ulyq meiram - Oraza aittyń onlain baǵdarlamasyn daiyndap qoidyq. Internet jelisi arqyly suraqqa jaýap alyp, onlain nasihat tyńdap, úiden shyqpai saýapty amaldarǵa ortaqtasýǵa bolady. Biz qazirgi jaǵdaidy eskerip, ótken jyly júzege asyrǵan jobamyz boiynsha pitir sadaqasy men zeketti onlain rejimde berýdiń ońtaily jolyn taǵy usynyp otyrmyz», - dedi Bas múfti Ortalyq kommýnikatsiialar qyzmetindegi brifing barysynda.
Qazaqstan musylmandary dini basqarmasynyń tóraǵasy el azamattaryn pandemiia kezinde barynsha saqtanyp júrýge, adam kóp shoǵyrlanǵan oryndarǵa barmaýǵa, aýyz bekitken jaǵdaida durys tamaqtanýǵa, múmkindiginshe jumys kestesin yńǵailap, densaýlyqty kútýge úndedi.
«Qasietti aida qaiyrymdylyq jasap, saýap alýdy niet etken jandarǵa aitarym: aýyzashar qoraptaryn eriktiler nemese meshit qyzmetkerleri arqyly kómekke muqtaj azamattarǵa jetkizýge bolady. Dini basqarma Ramazan aiynda sanitarlyq talaptardy saqtai otyryp, qaiyrymdylyq is-sharalaryn josparly túrde júzege asyrady. Barshańyzdy igi iske úles qosýǵa shaqyramyn», - dedi Naýryzbai qajy Taǵanuly.
